Cabugao, Ilocos Sur – Ti Brgy. Maradodon ket naipaayan ti napintas a kongkreto a kalsada iti agdama nangruna iti sentro ti barangay a mapan iti Sitio Bio. Iti naglabas a tawen, dakkel a kantidad ti nailatang a mabusbos manipud iti 20% Development Fund a pagmantener ti kalsadada. Ngem bimmassit itan agsipud iti panangikagumaan ti agdama nga administrasion babaen ken ni Mayor Edgardo “Ediboy” S. Cobangbang, Jr. a nangiringpas ti pannakasemento ti kalsadada babaen ti pundo ti Municipal Share ti R.A. 7171 ken Kongresional.
Maysa kadagiti kangrunaan nga ipamaysada ita a pinunduan iti 20 % Development Fund-da ket ti pannakaipasdek ti Barangay Health Center ngamin ket adayoda ti ili ket posible pay a maaramid ti Botika ti barangay ditoy a paggatangan ti nalaka ngem epektibo nga agas. No adda man pagkuranganna ket kiddawendanto ti tulong ti Gobierno Munisipal.
Maisarsaruno a maaramid ti Day Care Center tapno addanton kabukbukodan a pagpusiposan dagiti babassit nga ubbing babaen ti tulong ti LGU.
Nupay managdaldalus ti bumarangay, panggep ti Konseho ti mangaramid ti Material Recovery Facility (MRF) tapno maidalimanek ditoy dagiti saanen a mausar nga scrap, bote, landok kadagiti pagtaengan kas ipaannurot ti linteg babaen iti Solid Waste Management.
Pagyamanan ti sibubukel a Konseho nga idauluan ni Brgy. Captain Geogie R. Benavidez ta saan a mapukaw ti espiritu ti “bayanihan” ken maibilang ti ragup nga obra ti barangay a mangiringringpas ti dadduma a matrabaho a saanen a kasapulan nga aggasto pay ti barangay ti kantidad. # (Web In-Action)
No comments:
Post a Comment