Friday, March 9, 2012

TI DACLAPAN ELEMENTARY SCHOOL ITI AGDAMA

Cabugao, Ilocos Sur – Maysa ti pageskuelaan ti Daclapan Elementary School kadagiti eskuela-elementaria ti   DepEd District Cabugao a nadigem ti koordinasionna iti Gobierno Munisipal, Barangay, iti komunidad ken iti nagannak. Kasta ti pammasingked  ti kaaduan a bumarangay   ken kinanunongan  ni Mr. Edwin Sabio Savellano, Head Teacher 3 ti nasao a pagadalan.

Umuna unay, ti tulong ti Gobierno Munisipal nga idauluan ni Mayor Edgardo “Ediboy”  S.  Cobangbang, Jr.,  malaksid ti personal a donasion ti Mayor iti kongkreto nga alad ti eskuela idi awan pay isuna iti takem ken iti kuarto ti  Special Education Program (SPED) ti pagadalan nga inlungalongna ti pannakapadda daytoy.

Kinapudnona, daytoy  ti pagadalan iti barangay nga addaan ti kompleto a kongkreto nga alad (Perimeter Fence) nga indonar dagiti indibidual a mangitandudo  ken mayat ti pannakapinta ti alad iti sango ken dagiti pasdek-pagadalan, imbatad ti maysa a bumarangay nga agnaed iti asideg ti eskuela.
Addaan pay ti eskuela ti mini-kiosk, napintas ken nalawa a canteen ken naestilo a gate ti pagadalan.
Ti uppat a sementado a pathway ket proyekto ti Konseho ti Barangay idi panawen ni nag-Brgy. Captain Eufemio Frando. Agingga iti agdama ket   saan a naikkat ti alokasion ti 20% Development Fund ti Barangay a maiproyekto iti pagsayaatan ti eskuela.

“Pagyamananmi ta mannakitinnulong ti Gobierno Munisipal nga idauluan ni Mayor Ediboy ken ni SB Member Vicky S. Serna, Chairman, Committee on Education ta mapokusan  dagiti pagkurangan a kasapulan ti eskuela,” impeksa ni Head Teacher 3  Edwin S. Savellano.

Innayon ni Mr. Savellano a ti pannangted ti prayoridad ken importansia iti sektor-edukasion ket nabileg a pundasion  ti panangmuli ti naballigi a henerasion ti umili. # (Web In-Action)

Ni Mr. Edwin S. Savellano, Head Teacher 3, iti uneg ti nangayed nga opisinana
Ti uneg ti kuarto ti SPED

No comments:

Post a Comment