Cabugao, Ilocos Sur – Naangay ti miting ti New Maradodon Development Cooperative, Inc. babaen ti panang-preside ni Mr. Teddy Par, pannakabagi ti DAR-MARO Cabugao ken inasistiran ni Mrs. Elizabeth Pablico, DPA, ken Caretaker MARO ti Cabugao.
Daytoy a gannuat ket iwayat ti DAR-MARO ti pannaka up-date ti rekords kadagiti kooperatiba a naorganisar babaen ti opisinada kadagiti aw-away ken tingitingenda dagiti opisiales no aktiboda pay laeng a mangipatungpal iti pagrebbenganda. Napagnunumuan a maelektaran ti opisialesda ket nangpilida ti lima a kangatuan ti butos kadagiti nainominar ken napabutosan. Dagitoy a lima ket maibilangda a kameng ti Hunta Direktiba ken pagbubutosanda iti dagupda ti Presidente, Bise Presidente, Sekretario, Tesorero ken Auditor. Adda met tallo nga standing committee ket apointaranto dagiti BOD ti agtrabaho kadagitoy a komite.
Kangrunaan a natratar ti pannakasingir ti nabulod ti tunggal maysa tapno kualipikado a mare-estruktura ti utang ken ti panggepda nga ag-loan manen. Impaganetget dagiti pannakabagi ti DAR-MARO a bayadan dagiti nakautang ti nabulodda agsipud ta daytoy ti simparat ti pannakapatibker ti pinansial a kasasaad ti kooperatibada. Nagkumit dagiti nabutosan a balay-balayenda a singiren dagiti nakautang tapno awan ti rason a dida agbayad. Maikkan met ti deadline ti panagbayad ken maikkanda ti promissory note no umud-odda ti pawayway. Mabalin a maidatag iti legal nga alternatibo ti dina kayat ti agbayad.
Paset ti serbisio nga itden ti DAR-MARO ti pannakasustener dagiti kooperatiba nga adda iti salinong ti opisinada. # (Web In-Action)
No comments:
Post a Comment