WOMEN’S MONTH CELEBRATION, SEMINAR ITI CLIMATE CHANGE

Cabugao, Ilocos Sur – Naangay ti selebrasion ti Women’s Month ita a bulan ti Marso babaen ti pannakaaramid ti “Orientation Briefing on Climate Change, Adaptation RA 9262 cum Team Building and Lakbay Aral” babaen iti tema a: “WOMEN WEATHERING CLIMATE CHANGE: GOVERNANCE AND ACCOUNTABILITY, EVERYONE’S RESPONSIBILITY”  a  nagatendaran ti 45 a partisipantes agraman  dagiti pangulo ti opisina ti LGU Cabugao, PNP, MSWDO, DA-LGU,  Barangay Officials, ken kameng ti Sangguniang Bayan.

Immuna a naidaton ti Nasantuan a Misa iti 5:30  a.m.  Iti program proper, linuktan ni SB Member Vicky S. Segui, Committee on Women’s Affairs Chairman ket imbatadna nga iti Climate Change ken Global Warming ti pakayintekan ti aktibidad ti Women’s Month Celebration. Innayon ti  Konsehala a saan laeng koma nga agpatingga iti panagipatungpal iti paaramid ti Gobierno no di pay ket koma  agbalin a karit nga agtultuloy nga aramiden para iti pagsayaatan dagiti sumarsaruno a kaputotan.
Iti naibasa a mensahe ni Mayor Edgardo “Ediboy” S. Cobangbang, Jr. kimmablaaw ken dinakamatna ti pannakabigbig ti  karbengan dagiti babbai: Women Empowerment . Pammasingked ti pannakaadda  ti dua a  babbai a  nagbalinen a Pangulo ti Pilipinas: Ms. Gloria Macapagal-Arroyo ken Corazon C. Aquino ken iti ili babaen ken ni Nag-Mayor Andrea “Dely” Soller-Tan.

Impasingked ni Mayor Ediboy ti naan-anay a suporta ti Administrasionna kadagiti gannuat a kayat nga aramiden ti sektor ti babbai ditoy ili ti Cabugao.

Inyam-ammo ni Mrs. Joenah G. Sevilleja, Agricultural Technologist, dagiti nagatendar; Overview of the Program ni MSWD Officer  Mrs. Lydia S. Gazmen; Climate Change Adaptation ni LGO Officer 5, Ms.  Connie L. Quinola; ken SPO1 Bernadette Aquino iti sinaguday ti RA 9262.

Napabaknang ti padas ken kaammuan dagiti nagatendar babaen kadagiti grupo a workshop ken aktibidad a  mainaig iti Team Building. Kalpasanna, naaramid ti “Picnic sa Complex”  ken naiwayat ti Lakbay Aral iti nadumaduma a disso a papananda  iti Probinsia ti Ilocos Sur mangrugi iti 2:00 P.M. iti dayta met la a petsa.

Nakitinnarabay  met da SB Member Josefina S. Vallejo, SB Member Jemaima Tan-Yee,  M.D.,  Budget Officer Marietta S. Cruz ken Municipal Civil Registrar Linda S. Gazmen.  # (Web In-Action)