DUA A GAKAT, NATAMING ITI PUBLIC HEARING

Cabugao, Ilocos Sur – Naisayangkat ti Public Hearing ti dua a gakat a binukel dagiti kameng ti  Sangguniang Bayan ti ili a Cabugao, Ilocos Sur  idi Marso 2, 2012 a no sadino a ditoy ket nagpartisipar dagiti aggatgatang ti tabako, pannakabagi ti maseknan nga opisina ti LGU, Kapitanes ti Barangay, ken Polisia.

Immuna a natratar  ti gakat a mangipaulog ti pagalagadan ti panaggatang ken panagiruaran  ti napagango a tabako-Birhinia iti masakupan ti ili a Cabugao, Ilocos Sur. Tinarawidwidan ni ABC President, Brgy. Captain Teddy U. Soller, Vice Chairman, Committee on Trade  iti Sangguniang Bayan ti pannakadiskutir ti nasao a gakat. 

Kalpasan ti panagsisinnukat ti kapanunotan dagiti nagatendar,  adda laeng mainayon a suhestion iti draft ordinance  agsipud ta maisubli pay a maadal iti Konseho Munisipal para iti  pannakarepasona.

Kangrunaan a linaon ti gakat ket ti panagbayad ti permit ti amin nga aggatgatang (cowboy)  ti tabako, maikkan  ti Certificate of Purchase (COP) ti mannalon babaen ti aggatang ken Purchase Invoice Voucher (PIV) nga ited ti Trading Center iti akin-produkto tapno adda pagibasaran ti naggapuan ti tabako.

Maipasdek pay ti Checkpoints ti boundary to boundary ti Munisipalidad a mangusisa  ti mairuar a tabako kasta met a nailanad ti akem dagiti agrebbeng a kas  iti National Tobacco Administration (NTA), Trading Centers  ken  ti LGU-Cabugao.

Babaen ti nasagap nga impormasion kadagiti nagatendar, manamnama nga addanto met  pagbaliwan ti “draft ordinance”  iti dokumento   a pakaipinalanna.

Naitarapnos met a napagsasaritaan ti operasion ken mentenansia ti Lakbay Aral Bus ti Munisipio. Tinimonan ni SB Member Richard T. Alcid, Chairman, Committeee on Transportation and Communication  ti diskusion.  Adda nagatendar a nangisingasing nga ibaklay la koman ti Munisipio ti magastos ti mentenansiana, ngem saan a napatgan ngem ketdi adda suhestion a nababbaba ngem ti P5,000 ti maipaulog a pangarkila no adayo ti papanan. Aktibo  ti diskusion a nagresulta ti panagballigi ti public hearing.

Nakipagtaming met da Vice Mayor Danny Q. Gazmen,  Municipal Treasurer Lourdes A. Azcueta, SB Secretary Maxfel S. Suboc, SB Member Vicky S. Serna, SB Member Carlito S. Pano, M.D., SB Member Josefina S. Vallejo ken SB Member Benedict M. Savellano, Chairman, Committee on Rules.   # (Web In-Action)