Wednesday, March 21, 2012

UMAD-ADU TI MAPAN AGPAKONSULTA ITI RHU

Cabugao, Ilocos Sur – Umad-adu ti bilang ti umili a mapan agpakonsulta/agpaagas iti Municipal Rural Health Unit (RHU)  ti Munisipalidad ti Cabugao no ikomperar iti napalpalabas a bulan kas maobserbar iti lawlawasna a kasasaad iti Balay ti Salun-at.

Iti biang ti OB-GYNE, babaen ti interbiu a naiwayat iti kaaduan nga inna nga agparparikna ket maiparbeng  unay ta babbai dagiti doktor nga agserserbisio iti aldaw ti Martes ken Huebes nga isuda Dr. Mimi Pira-Sy ken Dr. Ivy  Castro-Bello.

Innayon dagiti inna (masikog ken saan) a saanda a mabain nga agparikna ken mailawlawagda  ti husto a  riknada no padada a babai ti pangibagaanda a kas kadagitoy a nadamat a doktor.

Iti sabali a bangir, dupudop met ti umili a mapan iti General Consultation iti aldaw ti Lunes ken uray ania nga aldaw a kaadda ti Health Physician ti RHU. Depende met ti nakaeskediul nga aldaw ti papan dagiti inna a masakupan ti Family Planning Program tapno maalay-ayan ti panagassitgan dagiti  inna. Aldaw ti Dentista iti Lunes ken Martes babaen ken Dr. Magno Sol, DMD  ken Huebes met ti batang ni Dr. Ma. Anastacia I. de los Reyes. Nupay kasta, maibabaet latta ti konsultasion para kadagiti pasiente nga umay iti RHU.

Iti napalabas a lawas, naiwayat ti pannakaidanon ti serbisio-medikal ken dental iti Day Care Centers iti barbarangay. Dagiti saan a nakapaagas ket iyanusda ti mapan  iti RHU nangruna dagiti ubbing a di pay nabakunaan.

Segun ken ni Dr. Loty Tayao, Municipal Rural Health Physician, mariknada a Medical Personnel  ti pannakabang-ar ken pannakapalag-an dagiti nagpaagas a kabulon ti panagyamanda iti LGU iti panangidaulo ni Mayor Edgardo “Ediboy” S. Cobangbang, Jr. agraman iti Komite ti Salun-at ti Konseho Munisipal babaen ken ni  Committee on Health Chair,  Dr. Carlito S. Pano, M.D.  ta adda masindadaan nga agas a maikapet a saan a kas iti kaaduan a padasda a reseta ti maalada iti panagpakonsultada. # (Web In-Action)

Ni Dr. Magno Sol, DMD

No comments:

Post a Comment