Cabugao, Ilocos Sur – Nagtataripnong dagiti dumadayo, opisiales ti Gobierno Munisipal nga idauluan ni Mayor Edgardo “Ediboy” S. Cobangbang, Jr., bisita, kameng ti media ken umili ti Cabugao, Ilocos Sur iti sibay ti pasdek ti Dayo Cabugao idi Marso 3, 2012 a no sadino a ditoy ket inimatanganda ti panangyawat ni Mayor Ediboy kadagiti opisiales ti Cabugao Livestock Traders Association nga idauluan ni Mr. Marciano “Amas” Raciles ti tseke nga aggatad ti Pitogasut ket Limapulo a Ribu a Pisos (P750,000) manipud iti pundo ti R.A. 7171 ti Gobierno Probinsial nga idauluan da Gov. Luis “Chavit” Singson ken Vice Gov. DV Savellano.
Impeksa ni Mayor Ediboy ti panagyamanna ken ni Gov. Chavit ken Vice Gov. DV agraman dagiti katinnarabayna iti pannakaiwardas ti Dayo Cabugao a nangatendar met iti nasao a pasamak nga isuda a pannakabagi iti Konseho Munisipal nga idauluan ni Vice Mayor Danny Q. Gazmen ken kadagiti barangay babaen ken ni ABC President, Brgy. Captain Teddy U. Soller.
Innayon pay ti Alkalde a kiniddaw ti asosasion daytoy a kantidad ket ammoda a taripatuen ken dagiti opisiales ti nangidarirag ti regular a pannaka-audit daytoy tapno rumangpaya ket mairagpat ti kabaelanda babaen ti pannakapapigsa ti “purchasing power” ti tunggal kameng.
Imbatad met ni SB Member Benedict M. Savellano, Chairman, Committee on Agriculture, a “long term” a proyekto ti pannakasustener ti kasapulan ti Dayo. Innayonna nga adu pay ti mainayon nga impraestruktura. No maipakita a mapadakkel ti pundo, maikkandanto manen ti nayon a puonan para iti Dayo. Kangrunaan pay a maipasagepsep ti pannakapunas ti “dole out mentality” iti asosasion. Maikkanda ti pangrugian ngem agtrabahoda a mamagballigi ti Dayo babaen ti panangtarabay ti Gobierno Munisipal ken Probinsial kadakuada. # (Web In-Action)
No comments:
Post a Comment