FFS GRADUATION, NAARAMID KADAGITI MANNALON ITI DUA A BARANGAY

Cabugao, Ilocos Sur – Naangay ti Graduation dagiti mannalon iti Barangay Bungro, Cabugao, Ilocos Sur a nagadal iti “Season-Long Farmers Field School of Local Farmer Technician   on Sustainable Corn Production”  nga inesponsoran ti DA-RFO 1, San Fernando City, La Union ken ti LGU-Cabugao nga idauluan ni Mayor Josh Edward S. Cobangbang idi Pebrero 21, 2017 iti  Brgy. Bungro, Cabugao, Ilocos Sur.

Iti programa, nangipaay ti Inspirational Message ni Mayor Josh Edward S. Cobangbang. Kinablaawanna dagiti Opisiales ti Department of Agriculture (DA), DA-LGU Cabugao, Opisiales ti Brgy. Bungro kasta metten  kadagiti nagturpos itoy a panagadal.

Bininsa ni Mayor Josh Edward iti pateg ti naadal dagiti nagturpos a maiyallatiw pay iti dadduma a Corn Farmers a mangpasayaat iti Sektor-da. Nangipaay ti Ama ti Ili iti Impresion ket kunana a maragsakan ta naikkan ti gundaway   a makaimatang  iti panagserbina iti kaadda ti kakastoy a programa. Kunana nga agbalin metten  a parte isunan kadagitoy  a nasursuro dagiti mannalon ket napintas dagitoy a maipadamag a ditoy Cabugao ket ammoda nga annuroten dagiti pagrebbenganda a kas maysa a masakupan ti programa para iti pagsayaatan dagiti umili.

Pinagyamanan dagiti mannalon ditoy a barangay  iti Ahensia ti DA ken ti LGU-Cabugao  kadaytoy a nagun-odda. 

Iti sabali a bangir, naaramid met ti panagturpos dagiti nagadal nga agmulmula ti nateng iti Barangay Bato, Cabugao, Ilocos Sur iti kamalman ti Pebrero 21, 2017. 

Nagturpos dagiti nagadal iti Eggplant & Pepper Production iti naangay a Farmers Field School (FFS)  Session  a nakatiponan dagiti  Vegetable Growers  iti Brgy. Bato, Cabugao, Ilocos Sur.

Nagrugi daytoy a proyekto ti High Value Crops Development Project (HVCDP) ken ti LGU-Cabugao   idi Nobiembre 2016 ket naapiten dagiti naimula iti uppat a disso a nakaimulaan dagiti bin-i a nagpaay a Learning Field dagiti Farmer-Cooperators.

Iti Graduation, nagatendar da SBM Atty. Randy Baniaga G. Kinaud, Committee Chairman  on Agriculture & Cooperatives; Opisiales ti DA-ATI ken kameng ti OPAG-Ilocos Sur  kasta metten dagiti  Staff ti DA-LGU nga idauluan ni Municipal Agriculturist Robert S. Savella.

Dagitoy a gannuat ket paset iti agtultuloy a panangtarabay/programa  ti Gobierno Munisipal nga idauluan ni Mayor Josh Edward S. Cobangbang kadagiti agmulmula iti   cash crops tapno agtultuloy a maingato  ti matgedan dagiti mannalon iti daytoy a benneg.  # (Web In-Action)