Friday, February 10, 2017

FFS TI PANAGMULA TI TARONG, UMADANIDAN NGA AGTURPOS

Cabugao, Ilocos Sur –Napagsasaritaan iti  umadani a panagturpos dagiti nagadal iti Eggplant Production iti naangay a Farmers Field School (FFS)  Session  a nakatiponan dagiti  Vegetable Growers  iti Brgy. Bato, Cabugao, Ilocos Sur idi Pebrero 9, 2017.

Indauluan da Ms. Ester P. Aguimbag, AT, DA–LGU Cabugao ken ni  Mrs. Remedios P. Inovejas, OPAG-Ilocos Sur a nangtimon iti napagsasaritaan.   Nakitaripnong met dagiti  Staff  ti DA-LGU a nakipagtaming kadagiti napagnunumuan dagiti FFS Learners nga indauluan ni Municipal Agriculturist Robert S. Savella.

Nangrugi daytoy a proyekto idi Nobiembre 2016 ket maap-apiten dagiti naimula a tarong iti uppat a disso a nakaimulaan dagiti bin-i a nagpaay a Learning Field dagiti Farmer-Cooperators.

Imbatad ni Ms. Aguimbag a naballigi ti resulta iti nadakamat a panagadal ket agpaay daytoy a pagtuladan dagiti mannalon a mayat nga agmula ti tarong ta nataray a lakuen daytoy a nateng iti merkado.

Dagitoy a gannuat ket paset iti agtultuloy a panangtarabay/programa  ti Gobierno Munisipal nga idauluan ni Mayor Josh Edward S. Cobangbang kadagiti agmulmula iti   cash crops tapno agtultuloy a maingato  ti matgedan dagiti mannalon.  # (Web In-Action)

No comments:

Post a Comment