Cabugao, Ilocos Sur – Nangrugi a nagtrabaho dagiti dati a kameng ti Registered Nurses for Health Enhancement and Local Services wenno (RN-HEALS) kalpasan a maipabaro ti kontratada iti 6 a bulan iti 2017.
Agtrabahoda dagiti 11 a Nurses ditoy Rural Health Unit (RHU)-Cabugao iti panangtarabay ni Mrs. Janet Sison, Registered Nurse, RHU Cabugao babaen iti Nurses Deployment Program (NDP) ti Department of Health (DOH). Isuda ti katulongan iti pannakaipatungpal ti “Kalusugan Pangkalahatan Program” ti DOH partikular para iti 4 Ps kadagiti barangay ti Munisipalidad.
Kangrunaan nga ar-aramidenda kadagiti 4 Ps Area ket tumulong iti panagala ken update ti Profile kadagiti kameng. Tumulongda pay iti RHU Center nga agasikaso kadagiti kliente a mabakunaan, matratar nga ubbing ken maladaga ken dadduma pay a trabaho ti Nurse iti balay-pagagasan ti Munisipio.
Ti pannakaipaay ti serbisio dagiti kameng ti Nurses ti NDP (dati nga RN-HEALS) kadagiti umili ket parte iti programa ti salun-at nga itantandudo ni Mayor Josh Edward S. Cobangbang tapno maatendaran dagiti kasapulan dagiti umili ket maipaay dagiti umisu a serbisio tapno mapagtalinaed ti gin-awa ken sudi nga ipaay ti pateg ti salun-at. # (Web In-Action)
No comments:
Post a Comment