Tuesday, February 21, 2017

MASS WEDDING 2017, NARAGSAK KEN NABALLIGI!

Cabugao, Ilocos Sur – Naangay ti  Cabugao Mass Wedding Program ti LGU-Cabugao   iti Cabugao Cultural and Sports Complex, Brgy. Rizal, Cabugao, Ilocos Sur idi Pebrero 20, 2017.

Iti panangrugi ti programa, immuna ti panagmartsa dagiti  agparis a nagkasar  a sinaksian dagiti ninong ken ninangda  iti uneg ti nadakamat a Building.  


Iti Opening Program, naaramid ti Prayer babaen ken ni Mrs. Lucille S.  Somera. Indauluan met ni Municipal Treasurer Mrs. Lourdes A. Azcueta ti pannakakanta ti Philippine National Anthem ken ti Cabugao Hymn.

Nangited ti Welcome Address ni  SBM Vicky S. Serna.  Kinablaawanna dagiti 19 a paris nga agkasar ken manganak agraman dagiti Bisita ken Opisiales ti Ili a naitaripnong iti panangidaulo ni Mayor Josh Edward S. Cobangbang. Bininsana ti pateg daytoy a programa ti LGU-Cabugao a mangsimpa ti kasasaad dagiti agassawa a saan pay a nangawat iti kapatgan a Matrimonia ti Kasar. 


Naisaganad ti Seremonia ti Kallaysa. Naglilinia manen dagiti nagkasar a kaduada dagiti ninong/ninangda sada nagmartsa  a nagpasango ken nagsirkuloda iti asideg ti Stage.  Inannong  ni Mayor Josh Edward S. Cobangbang babaen iti Bileg a naikawes iti Chief Executive  a mamagkallaysa kadagiti 19  a paris nga agkasar.

Kalpasan ti group picture dagiti nagkasar ken ni Mayor Josh Edward ken dagiti Opisiales ti Ili, nagsala dagiti newlywed couples. 

Iti Mensahe ni Mayor Josh Edward, kinablaawanna dagiti nagkasar ken agraman dagiti nanganak, sangaili ken  kabagian dagiti nagkasar ken iti amin a nagatendar iti nasao a seremonia. 

Imbatad ti Ama ti Ili a saan laeng a dagiti apagkallaysa ti nagasat ita nga aldaw ket uray met isuda a naaddaan ti parte a nangannong kadaytoy a mass wedding ceremony.


Pinagyamananna pay iti agtultuloy a panagtalekda ken pammatida  iti Gobierno Munisipal babaen iti pannakipartisiparda kadaytoy a programa ti Munisipio. Innayon ti Alkalde Munisipal a mainayon dagiti nagkallaysa a  mangbangon iti naresponsable a Pamilia a pangrugian ti natibker a  pundasion ti naurnos ken naprogreso nga ili ti Cabugao.

Nangipaay ti Mensahe  ni Mr. Edwin H. Ruiz, President, Philippine Association of Civil Registrars Region 1 Chapter. Inapresiarna daytoy a proyekto ti LGU-Cabugao babaen iti liderato ni Mayor Josh Edward S. Cobangbang  kasta metten  ken ni  Municipal Civil Registrar Office Mrs. Rosario Charity S. Abara  ditoy nga ili.

Nangipaay met ti Mensahe ni Mr. Nestor Bautista, pannakabagi ni Mr. Reynor Fernando, Provincial Statistics Officer.

Naisaganad ti “Kiss with the Bride” a ritual ti panagkallaysa. Naaramid pay dagiti ritual ti “Cake” ken “Champagne Toast”.


Kabayatanna, naited dagiti sagut kadagiti nagkasar  ket indauluan da Mayor Josh Edward S. Cobangbang  ken ni Vice Mayor DJ Savellano ti nagiyawat iti sagut a binayabay ida da SBM Danilo  Q. Gazmen; SBM Vicky S.  Serna; SBM Dr. Jemaima S. Tan-Yee; SBM Josefina S. Vallejo; MSWD Officer Mrs. Lydia S. Gazmen;  Municipal Civil Registrar Mrs. Rosario Charity S. Abara.

Nangited  ti Closing Remarks ni SBM Danny Q. Gazmen. Bininsana ti pateg daytoy a tinawen a  pribilehio nga it-ited ti Munisipio a libre a serbisio para kadagiti saan pay a nagkasar.

Kalpasan ti Seremonia ti Kallaysa, naaramid ti panamagsasango dagiti amin a nagatendar  kadagiti naisagana a taraon kalpasan iti Thanksgiving Prayer. # (Web In-Action)



No comments:

Post a Comment