Masaluadan ti kabaybayan iti Ilocos Sur manipud iti epekto ti kalamidad babaen iti pannakaisayangkat ti Integrated Coastal Management (ICM), segun kenni Bokal Christopher Baterina.
Kabayatan ti “Kapihan iti Amianan” Media Forum itay lawasna, kinunana ni Baterina a kasapulan ti ICM para kadagiti luglugar iti igid ti kabaybayan iti probinsia a naruay a dalapusen ti bagyo wenno dadduma pay a kalamidad.
Babaen ti ICM, maisayangkat ti pannaka- surbey dagiti amin a barangay iti igid ti baybay iti Ilocos Sur tapno maammuan ti epekto dagiti napalabas a bagyo.
Maammuan ti kasasaad dagiti bangkag a tineppang wenno linamut ti baybay ken no ania dagiti rumbeng maimula tapno masaluadan dagitoy a lugar no dumteng manen ti layus. Makita met ti kasasaad ti panagbiag dagiti lumugar iti igid ti baybay.
Daytoy ti pagbasaran dagiti maipaay a proyekto a makatulong iti panagbiag dagiti mangngalap ken dagiti kasapulan tapno masalakniban ti kabaybayan kontra iti ilegal a panagkalap.
Kuna ni Baterina a masapul nga adda mabangon a pagumokan dagiti lames iti kabaybayan tapno masigurado ti adu a makalapan dagiti mangngalap.
Pinalagipan ti bokal dagiti umili a saanda nga ipaanud dagiti basura iti karayan wenno iti baybay tapno maliklikan ti “pollution.”
Kinunana a rumbeng a karaman iti ICM ti nainget a pannakaipatungpal ti Solid Waste Management Act tapno ad-adda ti panakasaluad ti kabaybayan ken ti karayan.
Impasigurado ti bokal a suportado ni Gobernador Ryan Luis Singson dagiti nadakamatna a programa ti ICM.
Ni Bokal Baterina ti agdama a chairman ti committee on environment ken cooperatives iti Sangguniang Panlalawigan iti Ilocos Sur. # Source - (FGL/Ben P. Pacris, PIA-1 Ilocos Sur).
No comments:
Post a Comment