Cabugao, Ilocos Sur – Maangay ti umuna nga aldaw, Setiembre 28, 2016 iti 3-Day Unit Athletic Sports Competition 2016 (Setiembre 28-30, 2016) kadagiti pageskuelaan iti uppat nga ili a kas iti Sinait, Cabugao, San Juan ken Magsingal, Ilocos Sur iti uneg ti Cabugao Athletic Oval, Barangay Bonifacio, Cabugao, Ilocos Sur a pagatendaran dagiti napili nga Atleta a mangibagi iti tunggal pagadalan ti kada ili, Officiating Officials, Coaches, mangisursuro ken nagannak a nangtarabay kadagiti annakda a makibalubal iti dayta nga umuna nga aldaw ti panagsasalip iti nadumaduma nga sports events.
Sakbayna, naaramid ti Parada dagiti Delegado; Municipal Officials; Sports Officials ken dagiti Coaches iti aglikmut ti Poblasion sakbay a naaramid ti ababa a programa iti School Stage ti Cabugao South Central School a sumango iti Cabugao Athletic Oval.
Words of Welcome ti inakem ni Dr. Consesa T. Rumias, Ed.D, Public Schools District Supervisor ti Cabugao ken Magsingal DepED District. Kimmablaaw ken nagyaman iti ili a Cabugao, Ilocos Sur babaen iti liderato ni Mayor Josh Edward S. Cobangbang ta ditoy manen Cabugao ti pakaangayan ti Unit Meet agsipud ta ditoy pay laeng ti addaan iti pasilidad a kas iti Athletic Oval a mayataday a pagay-ayaman iti aggigiddan nga events.
Dinakamat ti Superbisora a babaen iti daytoy a kompetision ket mapili dagiti Atleta iti tunggal Unit ti DepED-Ilocos Sur (4 a Unit) a makipaset iti Division Sports Competition 2016 idiay Quirino Stadium inton Oktubre 17-21, 2016.
Simmaganad ti Lighting of the Symbolic Torch babaen ken ni Jerome Temporal, 2016 Palarong Pambansa Athlete.
Nangited ti Mensahe ni SBM Erwin B. Isaguirre, Committee Chairman on Education ti ili a Magsingal. Kimmablaaw ken nagyaman iti amin a nakipartisipar iti daytoy damo nga aldaw ti kompetision. Dinayawna ti agtultuloy a suporta dagiti Opisiales ti DepED ken LGU ti Cabugao ta daytoyen ti maikatlo a tawen a maang-angay ti Unit Meet ditoy. Kiniddaw ti Konsehal ti naan-anay a suporta ti amin iti Unit 1 para iti masungad a Provincial Meet.
Naaramid ti Presentation of Athletic Delegates babaen kadagiti Head iti Athletic Delegation iti uppat nga ili ken kasta metten iti Hoisting of the Delegation Flags babaen kadagiti Opisiales Lokal ken DepED iti tunggal ili.
Kalpasan ti intermission number ni Jennifer Raquepo, Division Champion iti Salip ti Panagkanta ket naisa ti bandera ti Unit Athletic Flag babaen kada Mayor Alrico A. Favis ken ni Public Schools District Supervisor Dr. Consesa T. Rumias, Ed. D.
Naisaruno ti panagsarita ni Mayor Alrico A. Favis a nangted ti mensahena a kas Host nga ili iti daytoy a pasalip. Dinakamatna ti pateg ti sports iti panagadal ket kayatna met a maipatulad kadagiti ubbing ken agtutubo iti bottomline ti sports kas iti kinadisiplina iti bagi ken sportsmanship. Nagyaman iti partisipasion ti amin ket kiniddawna ti aglaplapusanan koma a suporta ti amin para iti Unit 1.
Imbagian ni SBM Danny Q. Gazmen ni Mayor Josh Edward S. Cobangbang a nangted ti mensahena. Kimmablaaw ken nagyaman. Kunana a naragsak unay ti pusoda a mangawat kadagiti amin a simmangbay ditoy Cabugao kadaytoy a kompetision. Innayonna nga aramidenda ti amin a kabaelanda a mangpapintas pay ti athletic oval. Bininsana pay ti pateg ti disiplina ken sportsmanship kadagiti agballigi ken maabak ta sangsangkamaysa koma ti mangbukel iti Unit 1 tapno napigsa daytoy a Team a makisalip iti mapaspasangasangan a Division Meet .
Nangipaay ti Affirmation of the Amateur Athletic Oath ni Genine Marie R. Viloria.
Imbagian ni Mr. Elvis A. Tabugader, Principal II ni Mr. Jorge M. Reinante, CSEE, CEO VI, CESO V, Schools Division Superintendent a nangideklarar iti panaglukat ti paay-ayam.
Nakikaysa met iti nasao a programa dagiti Opisiales ti LGU ken DepEd ti ili a San Juan ken nangibagi ken ni Mayor Benjamin V. Sarmiento; Mayor Alrico A. Favis ken ti sibubukel a Sangguniang Bayan ti LGU-Magsingal; Opisiales ti ili a Cabugao a nangirepresentar ken ni Mayor Josh Edward S. Cobangbang; Opisiales ti LGU ken DepED ti LGU-Sinait a nangibagi ken ni Mayor Glenn B. Guzman. # (Web In-Action)
No comments:
Post a Comment