Cabugao, Ilocos Sur – Naaramid ti pannakaiyallawat dagiti ramit ti pagkalap a Payao (Floater, tali, drum, ken swivel) kadagiti asosasion ti mangngalap ken bumarangay iti Barangay Sabang; Dardarat, Salomague, Salapasap ken Pug-os iti ili a Cabugao, Ilocos Sur.
Inimatangan dagiti Opisiales ti Ili nga idauluan ni Mayor Josh Edward S. Cobangbang ken binayabay dagiti Opisiales ti Barangay ken mangngalap iti nadakamat a lima a Coastal Barangay iti napasamak a turnover iti Cabugao Cultural and Sports Complex, Brgy. Rizal, Cabugao, Ilocos Sur idi Nobiembre 3, 2016.
Nagun-od dagitoy a ramit manipud iti Bottom-up Budgeting (BUB) babaen iti Marine Reserve & Sanctuary Development a proyekto ti LGU-Cabugao ken ti BFAR Region 1 a nakaisibaran ti 10 Ektaria ti kalawana a breeding place dagiti ikan.
Nakikaysa met da Mr. Kyle Connelly, Peace Corps Volunteer ken Coastal Resource Management (CRM) Coordinator ti LGU-Cabugao, Municipal Fisheries Coordinator Milagros R. Paz; ken dagiti Project Coordinator ti BFAR Region 1.
Kabayatan ti turnover, impeksa ni Mayor Josh Edward ken dagiti idauluanna iti LGU-Cabugao iti panagyamanda iti Ahensia ti BFAR iti agtultuloy a panangipaayda iti kasapulan dagiti mangngalap tapno maidur-as ti kapabilidadda a mangnayon ti pagbiaganda.
Inggunamgunam pay ti Alkalde Munisipal iti agtultuloy a pannakamantener dagiti ramit ti pagkalap a maited ken naiteden kadakuada tapno napapaut nga usarenda ken pagririnnanudanda a sapasap.
Maipalagip a naudi a nai-award ti tallo a motorized banca ken 3 a Unit ti Payao kadagiti 4Ps Beneficiaries iti tallo a Coastal Barangay ti lli: Brgy. Sabang; Brgy. Daclapan ken ti Brgy. Namruangan, Cabugao, Ilocos Sur iti sango ti Munisipio idi Pebrero 1, 2016.
Dagitoy ket impaay met laeng ti Bureau of Fisheries and Aquatic Resources (BFAR) Region 1 nga idadauluan ni BFAR Regional Director Nestor Domenden, CESO V ken iti panangilungalong ti Gobierno Munisipal ti Cabugao nga idauluan idi ni Pasado Mayor Edgardo “Ediboy” S. Cobangbang, Jr.
Segun ken ni Mrs. Milagros R. Paz, Municipal Fisheries Coordinator ket ka-koordinarna dagiti asosasion ti mangngalap ken dagiti Opisiales kadagiti nadakamat a barangay iti pakaseknan ken pagdurdur-asan iti pannakatarawidwid dagitoy a proyekto.
Impeksa met dagiti mangngalap a mabenepisiaran iti naan-anay a panagyamanda iti BFAR ken ti LGU-Cabugao iti pannakanayon dagiti alikamenda a mausar iti panangpadur-asda iti sektorda a mangngalap kadagitoy a barangay.
Daytoy a pagimbagan ket nagubuay iti panangilungalong ti Gobierno Munisipal para iti agtultuloy a panagsalukag dagiti mangngalap iti ili ti Cabugao, Ilocos Sur. # (Web In-Action)
No comments:
Post a Comment