Cabugao, Ilocos Sur – Iti pannakiuman ti Web In-Action iti Nobiembre 24, 2016, imbatad ni Dr. Melvyn G. Castro, DVM, Municipal Livestock Coordinator nga agtultuloy ti pannakaidanon ti serbisio ti Beterinario kadagiti agsakit nga ayup ken dinguen no la ket ta maipakaammo iti Opisina ti Municipal Agriculture Office ti ili aldaw man ti Sabado ken ti Domingo.
Agtultuloy met iti pannakabakuna dagiti aso ken domesticated house pets iti Anti-rabies a pangkontra iti sakit ken maagasan dagiti agpanateng nga ayup.
Maikkan pay iti vitamin supplement a para ayup dagiti matakuatan a nakapsut ti resistensiana nga ayup.
Nupay kasta, innayon ni Dr. Castro a zero incidence ditoy nga ili iti nakaro a sakit ti animal a kas iti ephemeral fever (dengue) ditoy Cabugao a daytoy ti nagraira a sakit dagiti large cattle iti lokalidad iti kallabes.
Insupusop ni Dr. Castro kadagiti lumugar iti barangay a pappapananna a pagtalinaedenda koma a nadalus dagiti panganan ken bagi dagiti ayup ken dinguen tapno malapdan ti itataud ti sakit. Kasta met koma a maipaayan ti natalged a pagaponan/pagyanan dagiti ayup ken dinguen ken masalaknibanda iti nakaro a pudot ken lamiis wenno pannakababasa.
Iti panagasikaso iti Livestock Sector, kidkiddawenna pay iti pannakitunos koma dagiti mannalon a mangsabat kadagiti programa ti Munisipio/Probinsia iti panangpasayaat iti industria ti animales iti Munisipalidad.
Dagitoy nga aksion ken inisiatiba ket resulta iti nakammayet a programa ti Gobierno Munisipal nga idauluan ni Mayor Josh Edward S. Cobangbang tapno matulongan dagiti mannalon/umili iti mainayon a matgedanda iti panagtarakenan ti ayup ken dinguen. # (Web Situational Report)
No comments:
Post a Comment