Cabugao, Ilocos Sur – Naangay ti Barangay Assembly Day idi Marso 25, 2017 a kas panagtungpal iti pammilin ti Department of the Interior and Local Government (DILG), MC: 2017-31 iti amin a Barangay iti intero a Pilipinas babaen iti Tema: “Sulong Barangay Kontra Droga, Krimen at Katiwalian: Makialam! Makilahok! Makiisa!"
Sagudayen ti Proclamation No. 260 a napetsaan ti 30 September 2011 ket maangay ti Barangay Assembly Day iti maudi a Sabado ti bulan ti Marso ken maikadua a Domingo iti bulan ti Oktubre iti kada tawen.
Kabayatanna, nasapsapa ti naiyeskediul a pannakaangay ti Barangay Assembly Day ti dadduma a Barangay iti ili a Cabugao, Ilocos Sur, segun ken ni Municipal Local Government Operations Officer Constancia “Connie” L. Quinola, LGOO V, ti ili a Cabugao a nangtarawidwid iti pannakaipatungpal daytoy a pammilin.
Buklen dagiti nagatendar iti manipud agtawen ti 15 nga agpangato a nakarehistro iti barangay.
Kaaduan a Topiko a natratar kabayatan iti nasao a taripnong ket iti maipapan iti presentasion ti accomplishment and financial reports, problema, issues and concerns a mangapektar iti barangay ken iti pakaseknan pay iti solidwaste management, disaster risk reduction and management plan ti barangays, Re-greening Program ken dadduma pay nga aktibidades a kanaig iti naan-anay a pannakigamulo dagiti bumarangay iti pakaseknanda.
Innayon ni Mrs. Quinola a naannayas ti pannakaipatungpal daytoy a pammilin iti DILG iti 33 a barangay ti ili a Cabugao, Ilocos Sur ken naballigi a nataming dagiti napagsasaritaanda. # (JOED SAJONIA)
No comments:
Post a Comment