Cabugao, Ilocos Sur – Naluktan ti 2017 Cabugao Inter-Barangay Basketball Tournament idi Marso 4, 2017 ket umuna a naaramid ti Parada a naaramid iti aglikmut ti Poblasion a nagpartisiparan dagiti Basketball Players iti nadumaduma a Barangay, Coaches, Game Officials ken Marching Band ti Cabugao Institute, Cabugao North Central School ken ti Cabugao South Central School. Nangrugi ti Parada iti Cabugao Cultural and Sports Complex, Brgy. Rizal, Cabugao, Ilocos Sur a disso ti pagsasalipan ken ditoy met laeng a disso ti pakaaramidan iti Opening Program.
Iti Opening Program, indauluan ni SBM Vicky S. Serna iti Opening Prayer ken naaramid ti Pambansang Awit ken Cabugao Hymn babaen iti Cabugao North Central School Marching Band.
Simmaruno ti Welcome Remarks ni SBM Atty. Bryan Jett S. Pano, Committee Chairman on Sports. Inawisna ti imatang dagiti umili a mangbuya kadaytoy a kangrunaan a parang/pagteng ti sports nga aramiden dagiti umaayam iti barangay.
Innayon ni SBM Pano a daytoy a paay-ayam ti LGU-Cabugao ket panggepna nga ital-o ti kasasaad ti sports, napintas a panaglalangen, kooperasion, panangyadayo kadagiti agtutubo iti madi a bisio.
Nangited ti Mensahe ni SBM Danny Q. Gazmen a nangibagi ken ni Mayor Josh Edward S. Cobangbang. Kimmablaaw ken nagyaman ti Konsehal kadagiti agsasalip ken kasta metten kadagiti amin a naitaripnong iti Sports Complex.
Imbinsana ti pateg iti pannakipaset dagiti agtutubo iti programa ti Munisipio iti sports ken iti pannakairubuat dagiti aktibidades a mangparagsak iti panagpiesta ti ili iti bulan ti Abril 2017.
Ingunamgunamna iti pannakamantener koma iti sportsmanship dagiti amin nga agay-ayam.
Naisaruno a naibasa ti Oath of Sportsmanship babaen iti Basketball Player ti Brgy. Turod.
Naisaganad ti panagtitipon dagiti Captain Ball ti kada Team ket nakibinnunotda iti pakaipananda a Bracket (6 a Bracket) kadagiti agpartisipar iti Tournament.
Naaramid ti miting dagiti Coaches para iti Game Rules babaen kadagiti Opisiales a mangimaton iti paay-ayam sakbay a naaramid ti Ceremonial Toss ti bola iti tengnga iti nagbaetan ti Basketball Player ti Brgy. Maradodon ken ti Brgy. Catucdaan nga umuna nga agay-ayam nga inimatangan dagiti Opisiales nga isuda SBM Danny Q. Gazmen ken ni SBM Atty. Bryan Jett S. Pano.
Nakikaysa met dagiti Kapitanes ti Barangay a naitallaong nga idauluan ni ABC President Thaddeus U. Soller kasta metten dagiti Municipal Officials nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Josefina S. Vallejo ken ni SBM Atty. Randy Baniaga G. Kinaud. # (Web In-Action)
No comments:
Post a Comment