Cabugao, Ilocos Sur – Naangay ti pakontes iti Drawing, Poster Making, Photo and Essay Writing iti Bureau of Fire Protection (BFP) ti Munisipio iti Cabugao a kas highlights ti panangselebrarda iti “Fire Prevention Month” iti bulan ti Marso 2017 babaen iti Tema: “Bahay at Ari-arian ay Pahalagahan, Ibayong Pag-iingat sa Sunog ay sa Sariling Pamamahay Simulan”. Daytoy a pakontes ket nagpartisiparan dagiti ubbing nga agad-adal iti 10 nga eskuela-elementaria ken 5 nga high school iti ili ti Cabugao ket naangay iti Marso 7, 2017 iti BFP Compound, Brgy. Rizal, Cabugao, Ilocos Sur.
Dagiti sumaganad ti nangabak:
DRAWING CONTEST:
John Ryan Sambrana, First Prize; Russel Ingking, Second Prize; Janica Mendoza, Third Prize.
POSTER MAKING CONTEST:
John Paul Briones – 1st Prize; Reynard Manantan, 2nd Prize; Calvin Kenneth Lopez, 3rd Prize.
ESSAY WRITING CONTEST:
Marc Justin Molina – 1st Prize; Warren Raciles - 2nd Prize; Louie C. Villegas - 3rd Prize ken tallo pay a Contestants a nakagun-od iti Consolation Prizes.
Awan ti nagsasalip iti Photo Contest.
Iti Awarding Ceremony, nangted ti pakauna a panagsarita ni OIC Fire Marshal Elmer C. Acapuyan. Dinakamatna ti pateg iti panangimatang dagiti agtutubo a katinnulong ti BFP a mangipromot iti fire safety iti sapasap ken kasapulan met a maited kadakuada dagiti aktibidades a mangasa iti paglainganda.
Impeksa pay ti OIC Fire Marshal iti naan-anay a panagyamanda iti agtultuloy a suporta ti LGU-Cabugao nga idauluan ni Mayor Josh Edward S. Cobangbang kadagiti igannuat ti BFP a programa ken aktibidades iti fire prevention.
Simmaruno iti panakaiyam-ammo dagiti Board of Judges nga isuda MLGO Officer Constancia “Connie” L. Quinola; PAO Officer Atty. Rosario Vitamog-Palisoc ken ni Municipal Information and Tourism Officer Dario Roy Siruno babaen ken ni BFP Officer Cloyd Acosta.
Binayabay ni OIC Fire Marshal Elmer C. Acapuyan ni Mayor Josh Edward agraman dagiti BFP Staff ken dagiti nag-Hurado a da MLGO Officer Constancia L. Quinola; PAO Officer Atty. Rosario Vitamog-Palisoc ken ni Municipal Information and Tourism Officer Dario Roy Siruno a nagiyawat kadagiti premio; sertipiko ken Token kadagiti nangabak a Contestants agraman dagiti Coaches-da.
Nangipaay ti Mensahena ni Mayor Josh Edward. Kimmablaaw ken nagyaman iti sapasap iti pannakaikaso iti pannakairakurak iti pakaseknan ti fire safety tapno maliklikan ti didigra nga itden ti uram. Dinayawna ti kinaregta dagiti kameng ti BFP-Cabugao nga idauluan ni Fire Marshal Elmer C. Acapuyan a mangisayangkat kadagiti aktibidades a kas itoy tapno mariing ti karirikna iti kaaduan nga agannad. Imbatad pay ti Ama ti Ili a dakkel ti kaipapanan ti panangimula a nasapa ti konsepto ti Fire Safety kadagiti naganus ti isipna nga ubbing tapno mamuli ti kaririknada a makigamulo iti sapasap a pannaka-aywan iti panangliklik ti damsak nga itden ti uram.
Impaay ni SF02 Felipe Salvio ti Closing Remarks ket pinagyamananda a kameng iti BFP-Cabugao iti panagballigi daytoy a pakontes ken iti naan-anay a suporta ti LGU-Cabugao.
Nakikaysa met a nakitinnarabay dagiti Coaches a buklen dagiti mangisursuro kadagiti nagsasalip nga ubbing/agtutubo iti 15 a pagadalan ditoy Cabugao. # (Web In-Action)
No comments:
Post a Comment