Thursday, May 4, 2017

GROUNDBREAKING TI POLICE ASSISTANCE CENTER 2, NAARAMID

Cabugao, Ilocos Sur – Naangay ti Groundbreaking ti PNP Police Assistance Center  (Substation 2)  ti Cabugao Municipal Police Station a maipasdek  iti igid ti Kalsada Nasional, Barangay Sagayaden Sur, Cabugao, Ilocos Sur a no sadino a ditoy ket inimatangan dagiti Opisiales ken kameng ti PNP-Cabugao; Provincial PNP; Media; ken Kakapitanes ti 33 a Barangay ti ili. 


Naisaruno ti Inspection iti kabarbaro a pasdek ti PNP Police Assistance Center 1 iti asideg ti Cabugao Central Park (CCP), Barangay Bonifacio, Cabugao, llocos Sur  ket indauluan da Mayor Josh Edward S. Cobangbang ken ni PNP Deputy Provincial Director  for Operations Police Superintendent Julius Corpuz Niegos dagiti nagbisita.

Naisaganad ti Ceremonial Turnover of Firearms iti pasdek ti Early Childhood Care Development Building iti asideg ti Rizal Barangay Hall, Barangay Rizal, Cabugao, Ilocos Sur. Inannong da Mayor Josh Edward S. Cobangbang ken ni Police Superintendent Julius C. Niegos iti turnover  nga inimatangan dagiti PNP Officials & Personnel; Kapitanes ti Barangay; Kameng ti Media (Bombo Radyo; DWRS; ken ti ABS-CBN).

Buklen dagiti loose firearms a naisurender ken nai-turnover iti PNP Provincial Command ket iti 1 nga Armalite Rifle; 1 Shotgun; 5 a Rifle Grenade; 3 a Granada; 1 Caliber 45 ken 1 nga 9mm Pistol. Dagitoy ket boluntario a naisurender iti PNP babaen iti “Operation Katok” nga inlunsad ti Kapolisan ti Cabugao babaen iti pannakikammayet dagiti Opisiales ti Barangay daytoy nga ili.


Iti Programa, nangted ti Welcome Address ni Police Senior Superintendent Ramil Aquino Llarenas, Chief of Police ti MPS Cabugao. Imbatadna a maragsakan a mangpasangbay ti amin a nagatendar kadaytoy a seremonia iti groundbreaking iti nainayon nga estasion ti Polisia ti ili a Cabugao. Kimmablaaw ken nagyaman iti LGU-Cabugao nga idauluan ni Mayor Josh Edward S. Cobangbang iti agtultuloy a suportada iti PNP-Cabugao  ken kasta metten kadagiti Opisiales ti Provincial PNP nga idauluan da Deputy Police Director Superintendent Julius C. Niegos ken ni Camp Elpidio R. Quirino Commander William N. Nerona.

Iti mensahe ni Police Superintendent Julius C. Niegos a nangibagi ken ni PNP Regional Director Police Chief Superintendent Chato C. Collado, pinadayawanna ti LGU-Cabugao iti impakitana a suporta iti kapolisan kasta metten dagiti tulong a naggapu kadagiti  asosasion ti umili nga agnanaed iti abroad ta naikkan  ti importansia iti kasapulan ti  benneg ti Polisia. Innayonna nga adda iti strategic location dagiti nakaipasdekan dagiti dua a PNP Substation ket napintas ti pannakaideploy iti puersa nga agmantener iti linak ken talna. Pinadayawanna met ti LGU-Cabugao nga idauluan ni Mayor Josh Edward iti suportada kadagiti programa ken gannuat ti Polisia kasta metten dagiti Barangay Officials ken Barangay Tanod/BPATS a multiplier force kadagitoy a  krusada.

Kalpasan a naaramid ti ceremonial turnover, nangipaay ti Mensahena ni Mayor Josh Edward S. Cobangbang. Kimmablaaw ken nagyaman iti amin a naitaripnong iti Seremonia. Kunana a mapaneknekan manen iti dakkel a maaramidan ti napintas a panagkakammayet dagiti amin nga agas-asikaso iti linak ken talna. Pinagyamananna met iti panangbigbig ti Provincial PNP Officials iti nagapuanan ti LGU-Cabugao ken ti PNP Cabugao ken kasta metten dagiti naayat a kakailian iti abroad a nangisagut iti nainayon a pagyanan dagiti pannakabagi ti linteg tapno maaywanan ti peace and order ket agbiag a natalinaay dagiti umad-adu a bilang ti umili iti Cabugao.

Kalpasan ti Programa ket napagsasanguan dagiti naisagana a pagtaraon iti pangngaldaw. # (Web In-Action)
  

No comments:

Post a Comment