Cabugao, Ilocos Sur – Aldaw a pannakisinnarang dagiti agbirbirok ti trabahoda kadagiti pannakabagi ti opisina (Employment Firm) nga inimbitaran ti Department of Labor and Employment (DOLE) ken iti Gobierno Munisipal nga idauluan ni Mayor Josh Edward S. Cobangbang iti Abril 28, 2017 iti Cabugao Cultural and Sports Complex, Brgy. Rizal, Cabugao, Ilocos Sur.
Nasapa a dimteng dagiti agaplikar ti trabaho ken dagiti pannakabagi ti DOLE-Vigan City a kinadua dagiti pannakabagi ti LGU-Cabugao ken iti Human Resources Management Office (HRMO) nga idauluan ni HRM Officer Miss Teresita Maximina S. Sison.
Nagrehistro dagiti aplikante a naggapu iti nadumaduma a barangay ti Munisipalidad ken naiturongda kadagiti maseknan a pannakabagi nga agawat ti trabaho nga opisina iti nagaabay a lamisaan ken tugaw a pagyananda nga aginterbiu iti uneg ti Cabugao Cultural and Sports Complex, Brgy. Rizal, Cabugao, Ilocos Sur.
Imbatad ti DOLE Officer nga inisiatiba daytoy ti LGU-Cabugao tapno matulongan dagiti umili nga agsapsapul ti panggedanda ken maiyasideg kadagiti opisina ken kompania iti pribado a sektor (Local & Overseas).
Dakkel nga oportunidad iti agdama kadagiti agtutubo ti pannakaipatakder dagiti pasdek-negosio ken pagtagilakuan iti lokalidad a nakiraman para iti Job Fair 2017.
Daytoy a proyekto ket tinawen nga aramiden ti Gobierno Munisipal babaen iti pannakakikamayetna iti DOLE tapno maaksionan ti pakaseknan dagiti umili nga agbirbirok ti pagsapulanda tapno mapasayaat pay iti kasasaad ti panagbiagda. # (Web In-Action)
No comments:
Post a Comment