Cabugao, Ilocos Sur – Inawat dagiti nagtrabaho nga estudiante ti gatad a kaibatogan ti bayad ti serbisioda manipud iti HRM Office babaen ti panangaprobar ni Mayor Josh Edward S. Cobangbang iti panagtrabahoda iti 20 nga aldaw ti tunggal maysa kadakuada.
Inyawat ni Mayor Josh Edward dagiti gunggonada a nagtrabaho kadagiti SPES Employees a kaduana ni HRM Officer Miss Teresita Maximina S. Sison ken Staff iti HRMO ken pannakabagi ti DOLE-Vigan City itay nabiit.
Ti naited a sueldoda ket pakabuklan ti 60% nga ited ti LGU-Cabugao idinto ta iti 40 % met ti ited ti DOLE-Vigan City.
Sergun iti Human Resource Management Office (HRMO) ti LGU-Cabugao, adda ti 23 a bilang ti estudiante (umuna a batch) ti naikkan iti trabaho itay Bakasion 2018 ket nagtrabahoda kadagiti Opisina iti nadumaduma a Departamento ti LGU a nakaidesignaranda. 20 nga aldaw ti nailatang a panagtrabaho ti tunggal maysa kadagitoy nga estudiante a naggapu iti nadumaduma a barangay ti ili.
Iti pannakiuman ti Web In-Action kadagiti estudiante, imbatad dagiti immawat ti kantidad nga agyamyamanda unay iti LGU-Cabugao ta dakkel ti maitulongna iti 20 nga aldaw a panagtrabahoda iti gastosenda nga agbasa. # (Web In-Action)
No comments:
Post a Comment