Cabugao, Ilocos Sur – Nakasaganan a nagtignay ti puersa ti Municipal Disaster Risk Reduction Management Council (MDRRMC)-LGU Cabugao, Ilocos Sur iti panangidaulo ni Mayor Josh Edward S. Cobangbang, MDRRMC Chairperson ken iti panangimaton ni MDRRMC Officer Engr. Nestor B. Somera apaman a namonitorda ti isusungad ni “Bagyo Ompong” kangrunaan kadagidi aldaw a panagdaliasat ti kalamidad ditoy Ilokos idi Setiembre 15-16, 2018.
Malaksid iti panagmonitor ti MDRRMC Members iti National Highway, napanda kadagiti calamity prone area (inland ken coastal area) tapno makitada dagiti arayatenda gapu iti epekto ti napigsa nga angin ken kabulonna a tudo.
Daytoy a panagsagana ket naibasar iti nangato a level ti koordinasion iti MDRRMC kadagiti kabinuligna nga Opisina ken Ahensia ti Gobierno a kas iti PDRRMC-Ilocos Sur ken iti NDRRMC iti idadaliasat ti nakaro a didigra a napasamak iti las-ud ti AOR (Area of Responsibilities-da).
Kabayatanna, inalerto ti MDRRMC dagiti naapektaran a pamilia idiay Barangay Sabang; Barangay Namruangan; Barangay Daclapan ken Barangay Salomague ket naipanda iti pasdek ti Cabugao Evacuation Center sadiay Barangay Bonifacio, Cabugao, Ilocos Sur ket ditoyda a pinalabas ti dawel ti didigra.
Tinarabay ken tinaripato ida dagiti Municipal Employees & Personnel a nagserbisio ken timmulong kadagitoy a nadidigraan a kailian manipud pannakaibakuitda ditoy agingga a naitulodda kadagiti pagtaenganda idi simmayaaten ti tiempo.
Determinado met dagiti mangbukel ti Cabugao Rescue a pannakaramay ti MDRRMC iti Munisipio a nag-monitor, nag-rescue ken nag-clearing kadagiti naapektaran iti didigra a disso kalpasanna.
Inaramidda ti nagtultuloy a pannaki-koordinar ken pannakitinnulongda kadagiti timmarabay nga Opisiales ti Ili kabayatan ti ilalasat ti nadakamat a bagyo ken iti pannakikaysada kadagiti dadduma a Departamento ti LGU a kas iti MSWDO ken ti MHO-RHU ken kasta metten iti PNP ken BFP a kaduada a maseknan no dumteng ti kalamidad tapno napigpigsa ti grupoda a mangaksion kadagiti pakaseknan dagiti umili nagruna kadagiti barbarangay.
Dagitoy nga aksion ken inisiatiba ket maigapu iti napartak a panangipatungpal ti pagrebbenganda iti MDRRMC-Cabugao nga idauluan ni Mayor Josh Edward S. Cobangbang, MDRRMC Chairperson nga agibagnos iti maaramid nga aksion iti panawen a dumteng ti didigra tapno maprotektaran wenno maalay-ayan dagiti umili iti epekto ti dimteng a kalamidad. # (Web Situational Report)
No comments:
Post a Comment