PASILIDAD TI LGU, AGTULTULOY A MAMANTENER KALPASAN ITI KALAMIDAD

Cabugao, Ilocos Sur – Tumultulong ti grupo ti Clean and Green Program  ti Munisipio nga agdalus kadagiti kalsada ti Poblasion nangruna kadagiti Processional Routes, Pasilidad ti Munisipio (Parke ken Plaza); Food Court; ken idiay Athletic Oval   tapno mamantener ti pannakalinis ken pannakapapintas ti buya iti aglawlaw kalpasan iti ilalasat ti didigra a Bagyo Ompong.

Kabayatanna, kangrunaan a maikkan ti mentenansia ti panagdalus ket iti Cabugao Central Park (CCP) a daydaywen ti umili ken bisita  iti aldaw ken sardam; idiay NISTC Public Market a paggatangan ti kaaduan iti kasapulanda ken idiay Cabugao Athletic Oval a kangrunaan a pakaangayan ti paay-ayam ti DepED a kas iti Zone Meet; District Meet; Unit Meet ken Provincial Meet .

Iti sabali a bangir, agtultuloy met a mamantener ti kinadalus ken sanitasion dagiti pasilidad nga usaren ti sapasap nga aggatang iti NISTC Public Market. Kanayon a madalusan dagiti Comfort Rooms (CRs) iti likud ken sango ti pasdek-NISTC Public Market  tapno adda madadaan nga usaren ti publiko kabayatan nga addada a gumatgatang iti Tiendaan.

Segun ken ni MENRO-Designate  Edgar S. Balangatan, AT, agak-akem a dadaulo ti grupo a kalpasan a maiwakasda iti agsumbangir ti National Highway manipud iti Brgy. Sagayaden nga  agpatingga iti Brgy. Pug-os ket   nakikoordinarda pay kadagiti barangay ti Poblasion tapno tumulongda nga agdalus iti igid ti kalsada a mabatoganda.

Innayon ni MENRO Balangatan a monmonitorenda pay iti Cleanliness and Beautification dagiti pito a Coastal Barangays a kangrunaan a pagpasiaran  dagiti  Balikbayans/Bisita babaen iti pannakikammayetda kadagiti Opisiales ti barangay kadagitoy a lugar. Tumulongda pay a mangpalinis iti agsumbangir a paset ti National Highway iti agpa-Port Salomague ken iti Provincial Road (Cuancabal-Nagsincaoan).

Kabayatanna, nadutokan ni Ms. Racquel S. Ancheta a mangidaulo iti NISTC Public Market iti panagretiro ni Ms. Norma Z. Bertumen itay nabiit. 

Dagitoy nga aksion ken inisiatiba ket paset iti Direktiba ni Mayor Josh Edward S. Cobangbang  iti agtultuloy a pannakaipakat ti panagdaldalus ken panagpapintas  iti aglawlaw ti ili a pagsayaatan ken pakairanudan met laeng iti sapasap. # (Web In-Action)