Monday, December 17, 2018

1st EVALUATION TI GULAYAN SA PAARALAN CONTEST, NAARAMID TI SALOMAGUE ES

Cabugao, Ilocos Sur – Naaramid ti 1st Evaluation ti “Gulayan Sa Paaralan Contest”  kadagiti maisalip a pagadalan a masakupan iti   Cabugao DepEd District iti  pakontes ita ti   DepEd Ilocos  Sur. Nagbisita dagiti Opisiales ti DepEd-Ilocos Sur  idi Disiembre 14, 2018 ditoy ili a Cabugao.


Ti Vegetable Garden ti Salomague  Elementary School nga idauluan ni  Mr. Ronel M. Ubaldo, Head Teacher III ti nakatungpal iti pagannurotan para iti Gulayan Sa Paaralan iti las-ud  ti DepEd Cabugao District ket daytoy ti naisalip para iti Division Level ita a Tawen 2018.

Imbatad ni Mr. Ubaldo a babaen iti natunos a pannakikagamulo ti Parent Teachers Association (PTA) nga idauluan ni Mr. Epifanio Salarzon, Presidente iti nadakamat a pagadalan ket naisamirada iti agidaulo nga   aggarden ken isungsongda dagiti ubbing nga agmula met ti nateng iti arubayan ti pagadalan uray pay iti pagtaenganda. Kankanayon met a maar-aramid ti backyard gardening-da isu a manmano ti agdidinnawat ken agnateng ti mulada iti eskuela ta adda amin mulmulada a pagnatngan-da. Innayon pay ti Head Teacher  a nagaget dagiti bumarangay ti Brgy. Salomague  ta malaksid a mangngalap ti dadduma  a lumugar ket agmulada met latta iti cash crops a pangnayonda ti masapulanda.

Indauluan ni Public Schools District  Supervisor Dr. Consesa T. Rumias a nangpasangbay kadagiti Evaluators ti DepEd Division Level nga idauluan ni Dr. Jonathan Amilao, Schools Division Office, Ilocos Sur Division ken ni Ms. Debie Ann Saraos, Nursery In-Charge.

Dinakamatda pay iti napintas a panaglangen dagiti mangisursuro, nagannak ken lumugar ti barangay nga idauluan ni Brgy. Captain Johnrey C. de la Cruz pakaseknan kadagiti aktibidades-da ken proyektoda  iti pagadalan. 

Kabayatanna, napalaus ti ragsak ni Mr. Edgar S. Balangatan, Municipal Agricultural   Technologist  a nakakita ken nangbisita met  iti Gulayan Sa Paaralan ti Salomague Elementary School babaen iti liderato ni Mr. Ronel M. Ubaldo ken dagiti mangisursuro ti nasao a pagadalan. Gapu iti pannakitunos ken tulong dagiti nagannak babaen met ken ni Mr. Epifanio Salarzon,  PTA President  ken ni Mr. Marito Baclig,  Vice President  ket napapintas ken maay-aywanan a nasayaat dagiti nadumaduma a natnateng a napatanorda. Mangnamnama met ni Mr. Balangatan a mamantener latta iti nasao a gulayan tapno masindadaan a pagtaudan iti  masida ken pagtaraon. 

Innayon ni Mr. Balangatan a mayataday unay daytoy a gannuat ti pageskuelaan  iti agtultuloy a programa  ti LGU-Cabugao nga idauluan ni Mayor Josh Edward S. Cobangbang maipapan iti Vegetable Subsidy nga ipatungpal ti Municipal Agriculture Office tapno matulongan dagiti agmulmula ti nateng iti barangay (backyard gardening) ken uray pay kadagiti ubbing ken mangisursuro kadagiti  pagadalan ti ili. # (Web In-Action)

No comments:

Post a Comment