Cabugao, Ilocos Sur – Iti pannakiuman kadagiti Mangimatmaton iti Salun-at, impakaammoda a natapoganen ti panaglalamiis a bulbulan ket kasapulan latta ti panagdaldalus iti bagi ken iti ikub ti arubayan ken pagtaengan, regular a panagwatwat (30 minutos a napardas a pannagna) ken pannangan iti mayad-adu a prutas ken natnateng.
Innayonda a dagiti agag-agas nga addaan ti sakit ket kasapulan nga itugtugotda ken agtomarda a kas maiparbeng kadagiti maintenance-da tapno maliklikan ti panagkaro ti sakitda. Mainayonda a no nasustansia dagiti maipapauneg ket naandur ti bagi nga agibtur iti agbaliwbaliw a klima a pagaayat met dagiti dadduma a sakit a pagtaudan nangruna no kalamiisna.
Dadduma a naibatadda nga aramiden ti kaaduan:
1. Umisu a panangidulin kadagiti tedda a taraon tapno saan a mabangles ken maalisan ti mikrobio a pakaigapuan ti diarrhea, food poisoning, sakit ti tiyan ken panagsarua.
2. Terreden dagiti adda sakitna a Diabetics ti agipauneg iti nasam-it unay a maibilang ti soft drinks, ice cream, cake ken kanaigna a nalanit ken nataba a pagtaraon.
3. Pilien dagiti adda sakitna ti hypertension ken cardiovascular disorder ti kanenda ken malimitaran iti panagipaunegda iti naapgad; nataba ken makabartek a mainum.
Kabayatanna, naregta dagiti Health Implementers a buklen dagiti Medical Personnel ti Rural Health Unit (RHU); Barangay Health Workers (BHWs) ken Barangay Nutrition Scholars (BNS) iti pannangtedda iti agtultuloy nga importansia iti programa ti salun-at kadagiti umili ken iti naregget a pannakaipakat ti pagdur-asan ti salun-at ken nutrision babaen iti agtultuloy a panangtarabay ti Gobierno Munisipal nga idauluan ni Mayor Josh Edward S. Cobangbang. # (Web Situational Report)
No comments:
Post a Comment