Wednesday, December 5, 2018

MR. & MS. CNCS 2018 CORONATION RITES, NABALLIGI

Cabugao, Ilocos Sur – Naangay ti Coronation Rites ti Mr. & Ms. Cabugao North Central School (CNCS) 2018  iti malem ti  Disiembre 4, 2018 iti Cabugao Cultural and Sports Complex, Brgy. Rizal, Cabugao, Ilocos Sur babaen iti Tema: “ CNCS Sustains continuous improvement through partnership”.

Linuktan ni Mr. Nereo Lopez, PTA President ti programa ket kimmablaaw para iti amin a nakipaset kadaytoy nga aktibidad  ken dagiti opisiales  ti Gobierno Munisipal  a kankanayon a ka-danggay dagiti dadaulo  ti eskuela ken nagannak iti aniaman a gannuat a para iti pagsayaatan  dagiti agad-adal.

Daytoy nga aktibidad ket kulminasion ti Popularity Contest nga inangay ti nasao a pagadalan a nagbuligan dagiti mangisursuro ken nagannak/agay-aywan ti ubbing.

Insaad  da  Mayor Josh Edward S. Cobangbang ken ni  SBM Dr. Jemaima S. Tan-Yee, Committee Chairman on Education iti Mr. CNCS 2018 Yle S. Agustin 1st  idinto ta da Mayor Josh Edward ken ni Dr. Consesa T. Rumias, Public Schools District Supervisor ti nangkorona ken ni Ms. CNCS  2018 Princess Maexie Anne F. Triste 1st . 

Nangipaay ti Mensahe ni Mayor  Josh Edward S. Cobangbang. Kimmablaaw ken nagyaman ta kankanayon a maawis iti aniaman a pasken ditoy a pagadalan. Dinayawna ti napintas a kooperasion dagiti mangisursuro; nagannak ken iti LGU-Cabugao iti pannakaaramid  dagiti aktibidad; programa ken proyekto iti pagadalan a pagimbagan dagiti ubbing ken iti sapasap a komunidad ken umili.

Naiballaet a naipabuya dagiti Intermission Numbers ken Tribute to the Royal Court nga impaay dagiti agad-adal iti Grade Level kabayatan   iti pannakaited ti Sash, Coronet, ken  Trophy dagiti agparis  a Prinsipe ken Prinsesa iti 1st agingga iti 20th babaen kadagiti napusgan a mangiyawat. 

Nagsarita met da SBM Dr. Jemaima S. Tan-Yee ken ni Dr. Consesa T. Rumias, Public Schools District Supervisor a nagatendar iti Coronation Rites.  Anag ti mensaheda iti maipapan iti Tema ti programa nga agtultuloy ken  napintas a kammayyet ti amin a grupo a mangpaspasayaat iti pagadalan ti CNCS.

Iti pannakaserra ti Programa, nagyaman iti sibubukel a CNCS iti amin a timmabuno ken adda akemna iti panagballigi daytoy nga okasion iti pagadalanda. 

Nagatendar iti Coronation Rites da  SBM Danny Q. Gazmen; SBM Atty. Randy Baniaga G. Kinaud; SBM  Jayhan Alcid-Tan;  SBM Dodgie Santella; Ret. District Supervisors Rudy S. Vallejo ken ni Remigio Sunico; pannakabagi ti PNP-Cabugao ken ti Cabugao Fire Marshal, BFP; MLGO Officer Constancia L. Quinola; SB Secretary Maxfel S. Suboc; HRM Officer Mimie S. Sison; Municipal Treasurer Lourdes Azcueta; Mrs. Edith Siruno ken dadduma pay a naawis a Bisita.  # (Web In-Action)

No comments:

Post a Comment