“Para kadagiti nasirib nga agdama nga estudiante iti Grade 6 iti Ilocos Sur, umaykayo ageksamen iti Philippine Science High School National Competitive Examination (PSHS NCE) tapno no maipasayo ket agbalinkayo nga scholar iti prestihioso nga eskuela iti Department of Science and Technology (DOST) ket sagrapenyo dagiti adu a pribelehio ken benepisio ken makapagbasakayo iti pagadalan nga addaan kadagiti kompleto ken moderno a pasilidad ken alikamen.”
Dayta ti bugas ti awis ni Dr. Ronnalee Orteza, Campus Director ti PSHS Ilocos Region Campus, nga inrakurakna kadagiti miembro ti Ilocos Sur Integrated Press iti naangay a Kapihan iti Amianan Media Forum sadiay PSHS – IRC, San Ildefonso, Ilocos Sur.
Kadua ni Dr. Orteza dagiti kangrunaan nga staff ti PSHS – IRC a nangilawlawag kadagiti isyu ken pakaseknan ti pagadalan ken dagiti agtarigagay nga estudiante.
Kiniddaw pay ni Dr. Orteza kadagiti nagannak nga allukoyen ken suportaranda dagiti annakda nga agaplikar ken ageksamen ti PSHS NCE ta naidaklan a dayaw ken tulong kadakuada no makapasa ken agadal dagiti annakda iti PSHS gapu kadagiti adu a pribelehio ken benepisio a sagrapenda. Impakaammona a dagiti pribelehio ken benepisio dagiti scholars ket karaman ti libre a matrikula, libre a loan dagiti textbooks, binulan nga stipend, uniporme, ken transportation and living allowances para kadagiti nababa ti masapulanna, ken dormitory accommodation kadagiti estudiante nga aggapu iti adayo a lugar.
Impanakkel ti Campus Director ti kaadun dagiti nagturpos iti PSHS – IRC a nagballigi iti nagduduma a propesion nangruna iti benneg ti medisina, engineering ken dadduma pay a tay-ak. Impalgakna pay a 100% a nagturpos iti PSHS – IRC dagiti nageksamen iti University of the Philippines Admission Test, ken adu dagiti nakastrek iti UP College of Medicine Special Class nga agpaut laeng iti panagbasada iti pito a tawen.
Impakaammona nga umad-adun dagiti nagturpos ken agdama nga scholars ti PSHS – IRC a taga-Ilocos Sur pakairamanan ti ili a San Ildefonso. Impakammona nga iti agdama ket adda agarup 145 nga scholars manipud Grade 7–12 manipud kadagiti nagduduma nga ili iti Ilocos Sur. Impalgakna nga adu kadagiti sumrek iti Grade 7 ket naggapu kadagiti public schools.
Nailawlawag met iti forum a dagiti kualipikado a Grade 6 elementary pupil kadagiti eskuela a bigbigen ti Department of Education ket mabalinda ti agaplikar ken ageksamen iti PSHS NCE no addaanda iti final grade a 85% wenno nangatngato pay iti Science ken Mathematics nga ipaneknek ti report card.
No dagiti grado ti estudiante iti Science ken Mathematics ket nababbaba ngem 85%, kasapulan a mangipakita iti ebidensia nga isuna ket adda iti top ten percent ti batch-na. Nasken pay a Filipino citizen ken awanan iti pending wenno approbado nga aplikasion kas imigrante iti ganggannaet a pagilian. Nasken pay a nayanak idi wenno kalpasan ti Agosto 1, 2005. Masapul pay nga addaan iti satisfactory rating wenno katukadna iti Character Rating iti report card-na. Nasken a saan pay a nageksamen iti PSHS NCE iti naglabas. Masapul pay nga addaan iti nasayaat a salun-at ken kabaelanna ti agdalan iti nainget nga academic program.
Nailawlawag a dagiti kasapulan ket dua a kopia ti filled-up application form; dua nga agpada a kaudian a 1×1 ID pictures. Masapul met ti non-refundable test fee a P100 kadagiti estudiante ti private schools, ken libre kadagiti public schools. Kasapulan pay ti certified true copy ti report card a pirmado ti class adviser/principal. No ti final grades iti Science ken Math ket nababbaba ngem 85%, nasken ti sertipikasion ti pammaneknek a ti ubing ket karaman iti top 10% ti batch-na.
Nailawlawag a maysa laeng ti maisayangkat nga scholastic aptitude test (National Competitive Examination) a nadisenio a mangrukod ti Scientific Ability, Quantitative Ability, Abstract Reasoning, ken Verbal Aptitude. Naamuan a maangayto ti NCE inton Oktobre 19, 2019 iti PSHS – IRC para kadagiti aplikante iti Region 1.
Nairakurak pay a dagiti PSHS NCE Application Form ken kakuyogna a material ket saan a mailako, ken mabalin a ma-photocopy ken ma-down load iti PSHS link. Awan met ti reservation fee a kasapulan. Mabalin met a maipila iti PSHS IRC, DOST Regional office wenno Provincial Science and Technology Offices.
Naipaganetget a dagiti application form a saan a kompleto dagiti linaonna nga impormasion ket saan a maproseso, ket dagiti napunas (erasures), nainayon (alterations) ken naibaet (insertions) a detalye ket nasken ti initial ti aplikante.
Naipakaammo a ti deadline ti submission ti application form ket inton Septiembre 13, 2019. # Source - TAWIDNEWS
No comments:
Post a Comment