Cabugao, Ilocos Sur – Naangay ti panagsapata dagiti Opisiales-Lokal ti ili a Cabugao, Ilocos Sur iti Hunio 26, 2019 iti uneg ti Simbaan ti Iglesia Romano Katolika kalpasan iti naidaton a Nasantuan a Misa nga inannong da Msgr. Gary Formoso; Rev. Fr. Leo Rosabia ken ni Rev. Fr. Bayani Flores.
Umuna a paset ti Oath Taking ket iti pannakaaramid ti Thanksgiving Mass ket naaramid iti Processional, panagparang dagiti Newly Elected Municipal Officials ken Officiating Priests sa naisaganad ti selebrasion ti Nasantuan a Eukaristia.
Simmaganad ti panamagsapata ni Mayor Josh Edward S. Cobangbang kadagiti Sangguniang Bayan-Elect nga isuda Hon. Danilo Q. Gazmen; Hon. Jeremy A. Seguban, Jr.; Hon. Mariedes D. Soller; ken ni Hon. Randy Baniaga G. Kinaud.
Nagsasaruno dagiti nadakamat a Konsehales a pinagsapata ni Mayor Josh Edward a binayabay dagiti kameng ti pamiliada.
Simmaganad ti panagsapata ni Vice Mayor-Elect Hon. Jemaima S. Tan-Yee babaen ken ni Mayor Josh Edward, Administering Officer.
Pinagyamanan ti baro a bise mayor ti ili kadagiti nangbutos kenkuana agramanen dagiti kakaduana a kandidatos a nagkampania sakbayna. Kunana a dakkel nga obligasion ti agserbi iti takemna kas umuna a babai a bise mayor ket imbatadna nga aramidenna iti kabaelanna nga agtrabaho ket para kadagiti kailianna ti pangigapuanna iti napudno a panagserbi a manggun-od pay iti naprogprogreso a pagilian.
Naisaganad ti panagsapata ni Mayor-Elect Edgardo S. Cobangbang, Jr. ket pinagsapata ni Mayor Josh Edward S. Cobangbang. Iti Mensahe ni Mayor Ediboy, kinablaawan ken pinagyamananna dagiti nangsuporta kenkuana ken dagiti kakaduana kasta metten dagiti timmabuno iti seremonia ti panagsapatada ditoy uneg ti simbaan.
Kunana nga iti panagsublina iti takem ket maitultuloy ti panangiyimplimentarna kadagiti programa a pakalag-anan ti panagbiag dagiti kailianna. Innayonna a dagiti napipintas ken nasasamay a wagas ti panagserbi a nagapuananna kabayatan ti 6 a tawen a riniendaanna ti takem ket dagitoy ti pamuonan ken taktakderanna a maitultuloy a mangiburburay met iti agtultuloy a talek ken pammati dagiti kailianna gapu ta nagserbisioda ken ni Mayor Josh iti napudpudno nga awan ti napilpili wenno naidumduma a naserbian.
Pammasingked iti panagsapatada iti sango ti Dios ken iti tao a pagrubuatanda a mangitultuloy iti pudno a panagserbi nga awan ti mapilpili. Pinagyamanan ni Mayor Ediboy dagiti kakaduana ken ti pamiliana ken iti agtultuloy a panangtarabay ti Apo kadakuada kabayatan ti rugi agingga a naileppas ti kampania tapno maiyasidegda kadagiti kailianda ket maammuanda dagiti napapateg a pakaseknanda.
Pinagyamanna pay iti napintas ken nasayaat met a panagserbi ni Mayor Josh Edward a barona iti unos ti tallo a tawen a terminona. Mamati ti Ama ti ili a dagiti nairugi a pamuonan ti napudno a panagserbi ken iti tarabay ni Apo Dios ti nangkibin iti ubing a Mayor ta kinabaelanna daytoy a responsibilidad ket naipakitana dagiti napipintas a galad iti kinalider agsipud ta napadakkel isuna a nasayaat a tao ken umili.
Simmaruno ti panagsapata ni SB Member-Elect Josh Edward S. Cobangbang babaen iti panangannong ni Brgy. Captain Geogie R. Benavidez.
Iti mensahe ti outgoing Mayor, pinagyamamanna dagiti kailianna iti agtultuloy a talek ken pammatida ket kunana a dagiti nagapuananda ket maitultuloy babaen latta iti napintas a panagkakadua ken panagkikinnammayet. Kas SB Member, agtultuloy isuna a mangidur-as kadagiti programa para iti pagsayaatan dagiti kailianna.
Kalpasan daytoy, naituloy ti programa ti “Panagsapata 2019” iti Cabugao Cultural and Sports Complex a nakaaramidan ti Turnover Ceremony.
Naluktan ti programa babaen iti panagsarita ni Mr. Florante S. Jara, MPDC & Vice Chair, LG Transition Team.
Nangipaay ti Inspirational Message ni Mayor Josh Edward S. Cobangbang.
Naiballaet a naipabuya ti Intermission ti DepED Cabugao Dance Troupe.
Simmaruno ti turnover iti simbolo ti liderato babaen iti panangyawat ni outgoing Mayor Josh Edward iti simbolo ti liderato ken responsibilidad ken ni incoming Mayor Ediboy.
Naaramid ti Acceptance Message ni Mayor Ediboy.
Kalpasan ti seremonia, binendisionan ni Rev. Fr. Bayani Flores dagiti naisagana a taraon para iti amin a timmabuno. Nagpaay nga MC ni Mr. Gilbert Asuncion.
Nakikaysa met iti nasao a seremonia da ABC President Thaddeus “Teddy” U. Soller; dagiti Kapitanes ti Barangay; dagiti School Heads ken dagiti mangisursuro iti nadumaduma a pageskuelaan-Elementaria ken High Schools ti ili a Cabugao; Former Mayor Dely Soller-Tan; Balikbayans ken dagiti kameng ti Municipal Police Station a nangtarawidwid ti seguridad nga idauluan ni COP Ramil A. Llarenas ken kasta metten dagiti kameng iti Media. # (Web In-Action)
No comments:
Post a Comment