Cabugao, Ilocos Sur – Maar-aramid ti Dental Check-up kadagiti Day Care Pupils iti Munisipalidad ti Cabugao iti pasdek ti Cecilia T. Flores Memorial Dental Clinic, Cabugao, Ilocos Sur.
Babaen iti koordinasion ti Munisipio iti Doktor ti Dental Clinic ket mayeskediul ti papan dagiti ubbing iti tunggal Day Care Center (DCC) nga agpaamiris iti ngipenda iti nasao a dental clinic iti aldaw ti Martes.
Iti nadakamat a Dental Check-up, dagiti Day Care Pupils ket tartarabayen ida dagiti Child Development Worker (CDW) a destino kadayta a barangay agraman nagannak/guardian ken tumulong dagiti kameng ti Staff ti Dental Clinic a mangasikaso kadagiti maamiris nga ubbing.
Agserbi ni Dr. Ma. Anastacia de los Reyes, DMD iti nadakamat a Dental Check-up.
Daytoy nga aksion ken inisiatiba ket paset iti programa ti salun-at iti LGU Cabugao nga idauluan ni Mayor Edgardo “Ediboy” S. Cobangbang, Jr. tapno mamantener ti dental a salun-at dagiti umili nangruna kadagiti ubbing a maysa a kapatgan nga aspeto iti salun-at nga agtultuloy a matagiben. # (Web In-Action)
No comments:
Post a Comment