Cabugao, Ilocos Sur – Maang-angay ti LFT- Farmers Field School on Sustainable Rice Production a programa ti agrikultura a nagbuligan nga isayangkat ti Municipal Agriculture Office, LGU-Cabugao; DA-RFO 1; PHILRICE ken ti OPAG-Ilocos Sur babaen iti panangtarabay ni Supervising Technologist Obas Bill Y. Baclig, AT ken kaduana dagiti LFTs nga isuda Julio S. Serna ken ni Bert Vicente ken maidemonstrar idiay Brgy. Cacadiran, Cabugao, Ilocos Sur ita a Rainy Season 2019.
Naaramid ken narugian ti panagdemonstrar iti maiwayat a proyekto idi Hunio 18 ken Hulio 6, 2019.
Daytoy a panagadal ket inesponsoran ti Dapartment of Agriculture - RFO 1; OPAG-Ilocos Sur ken PHILRICE ken kakammayetna ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ipatungpal ti Municipal Agriculture Office nga imatonan ni OIC Municipal Agriculturist Nereo S. Daproza.
Dinakamat ni Baclig ti pateg ti panangadaptar dagiti mannalon iti agtultuloy a panagbaliw/pannakaipakat ti baro a Teknolohia iti panagmula ti pagay. Insingasingna a managimutektek koma dagiti mannalon kadagiti baro a wagas iti panagmulaan ti pagay tapno napardas ti panagdur-as ti kaammuanda.
Dagitoy nga aksion ken inisiatiba ket paset iti naregget a pannakaidur-as ti programa ti agrikultura iti panagrubuat ti administrasion ni Mayor Edgardo S. Cobangbang, Jr. a mangpaadu ti apit tapno supisiente latta ti pagtaraon dagiti umili ti Cabugao. # (Web In-Action)
No comments:
Post a Comment