Cabugao, Ilocos Sur – Iti pannakiuman ti Web In-Action idi Agosto 7, 2013, impeksa ni Brgy. Captain Melanio Santella ti Brgy. Alina-ay, Cabugao, Ilocos Sur ti nalaus a panagyamanda kadagiti kalugaranda iti pannakanayon manen ti sagiped ti pangpang ti Karayan Cabugao nga asidegda babaen iti pannakasemento ti igid ti karayanda.
“Pagyamananmi met unay daytoy kadagiti nagagaget a lideres ti barangay, ili ken Kongreso ta maaksionan a daras dagitoy a pakaprotektaran ti lumugar,” kinuna ni Mr. Maximo Pacis, 72, maysa kadagiti panglakayen ti Brgy. Alina-ay. “Sapay koma ta masurdongan latta daytoy a proyekto agingga iti mabatogan ti kabalbalayan idiay baba nga asideg ti rangtay.”
Daytoy a proyekto ket nagtaud iti Congressional Fund iti Termino ni agdama a Gobernador Ryan Luis V. Singson iti kaaddana pay laeng iti Kongreso ti Pilipinas ken iti LGU-Cabugao nga idauluan ni Mayor Edgardo “Ediboy” S. Cobangbang, Jr. # (Web In-Action)
No comments:
Post a Comment