Cabugao, Ilocos Sur - Iti pannakiuman ti Web In-Action idi Agosto 13, 2013, imbatad ni Mr. Edgar S. Balangatan, AT/DA-LGU a maipatpatakderen ti baro nga ALL- Season Plant Nursery iti asideg ti Greenhouse, Brgy. Baclig, Cabugao, Ilocos Sur.
Innayon ni Mr. Balangatan a daytoy a pasilidad ket naisangrat para iti all-season propagation ti vegetable seedlings nga igannuat ti LGU, labor counterpart ti asosasion ken mannalon nga agpatanor ti seedlings babaen iti panangtarabay dagiti Agricultural Technologists.
Daytoy pay a proyekto ket imatonan ni Mrs. Ester Aguimbag, AT ti LGU-Cabugao ken nakasalinong iti programa ti High Value Crops Development Program (HVCDP) iti DA-RFU 1 nga idauluan ni Mr. Angel Padilla, Regional Coordinator.
Insupusop ni Mr. Balangatan a kalikaguman ti DA-LGU a masustener ti panagmulmula ti nateng uray off-season type tapno maneutralisar ti presio ken suplay ti nateng iti merkado a daytoy ti maysa a nakasapulan a pagbiag ti inaldaw.
Dagitoy nga aksion ken inisiatiba ket bunga ti napintek a programa iti Agrikultura ti LGU-Cabugao nga idauluan ni Mayor Edgardo “Ediboy” S. Cobangbang, Jr. para kadagiti umili ti Cabugao, Ilocos Sur. # (Web In-Action)
No comments:
Post a Comment