Tuesday, August 20, 2013

BAGYO MARING, AKSION AGAD TI MDRRMC

Cabugao, Ilocos Sur – Apaman a naisibet ti Bagyo Labuyo, simmaruno a simrek ti Bagyo Maring iti lokalidad ti Ilokos a nangipagteng iti napigsa ken napaut a panagtudtudona. Daytoy ti nangitunda iti pannakalayus dagiti nababa ti dissona a lugar ken kabalbalayan kadagiti barangay ti ili a Cabugao, Ilocos Sur.


Nupay idi  aldaw ti Domingo (Agosto 18, 2013)  iti panangipautna ti tudo, nagtignay a dagus ti puersa ti Municipal Disaster Risk Reduction  and Management Council (MDRRMC) nga idauluan da Engr. Nestor B. Somera ken ni Engr. Crescencio C. Formoso a nagrekurida kadagiti apektado a barangay ken iti Poblasion. Pinagkurrida dagiti behikulo ti Munisipio ken linukatanda dagiti Hotline Numbers a naisangrat a para kadagiti adda iti barangay.


Idi Agosto 19, 2013, nagkammayet ti grupo ti  MSWDO nga idauluan ni MSWD Officer Lydia S. Gazmen ken dagiti kameng ti MDRRMC a napan nangited ti relief goods iti maseknan a lumugar iti  barangay a naapektaran kas iti Brgy. Sabang gapu iti didigra a pinataud ti Bagyo Maring. Ken Maisarsaruno met dagiti dadduma pay a barangay a maikkan iti tulong.( Brgy. Daclapan, Namruangan, Turod, Sitio Callaguip, Brgy. Baclig ken Barangay Quezon)

Dagitoy nga aksion ken inisiatiba ket resulta ti napintas ken sistematiko a panagtutunos dagiti Opisina ken Ahensia iti salinong ti LGU-Cabugao nga idauluan ni Mayor Edgardo  “Ediboy” S. Cobangbang, Jr. tapno maaksionan a dagus ken maipaay dagiti kasapulan dagiti apektado nga umili no tiempo ti kalamidad. # (Web In-Action)

No comments:

Post a Comment