Cabugao, Ilocos Sur – Naaramid ti panagklase dagiti kameng ti Reppa-ac Farmer’s Association babaen iti Farmers Field School nga iwaywayat ti DA-LGU Cabugao nga idauluan ni Provincial Agriculturist Zenaida S. Andrada ken ti DA-RFU 1 agraman iti OPAG-Ilocos Sur nga idauluan ni Provincial Agriculturist Teofilo R. Quintal idi Agosto 8, 2013 iti Rang-ay Multipurpose Building, Brgy. Reppa-ac, Cabugao, Ilocos Sur.Kangrunaan a naglektiur da Mr. Obas Y. Baclig, Miss Kathryn Tapuro ken Mr. Robert S. Savella., Naiyadal kadagiti partisipante maipapan iti AESA 2 (Agro-economic System Analysis) kalpasan a napan nagobserbar dagiti mannalon iti Learning Field-da a karaepan nga aglawa iti 5,000 metro-kuadrado.
Daytoy a proyekto ket ipromotna ti panagpatanor ti pagay a maiyataday iti aglawlaw tapno magesdan ti panagusar ti nakaro a komersial nga agas ken insektisidio a makadangran kadagiti konsumidores iti maapit a pagay. Kasta pay a mapalag-anan dagiti mannalon iti maikabassit a gastos ket maingato ti matgedan dagiti mannalon.
Dagitoy nga aksion ken inisiatiba ket bunga ti sistematiko a pannakaipakat ti programa ti kabaruanan a teknolohia ti pagay ken kabaruanan a klase ti pagay. Daytoy a gannuat ket itandudo ti LGU-Cabugao iti nadur-as nga Agrikultura babaen iti panangidaulo ni Mayor Edgardo “Ediboy” S. Cobangbang, Jr. tapno maikkan ti importansia ti mayoridad nga umili ti Cabugao, Ilocos Sur a mapasayaat ti pagsapulanda. # (Web In-Action)
No comments:
Post a Comment