Thursday, August 8, 2013

CATTLE PROJECT TI 4-H CLUB, DUMURDUR-AS

Cabugao, Ilocos Sur – Iti pannaki-amad ti Web In-Action idi Agosto 7, 2013, imbatad ni Mr. Obas Bill Y. Baclig/AT, agak-akem a Municipal 4-H Club Coordinator a kankanayonna a monitoren dagiti asosasion ti 4-H Club a nakaitedan dagiti baka a paset ti Performance Challenge Fund ti Munisipio a naipaay kadagiti agtutubo kas proyektoda iti cattle production.

Innayon ni Mr. Baclig nga adda 12 a barangay a dagitoy ket iti Brgys. Bonifacio, Arnap, Nagsincaoan, Cacadiran, Cuancabal, Salomague, Cael-layan, Pug-os, Bato, Namruangan, Bungro ken Reppa-ac a naed iti  16 a kameng a nakaipaimaan dagiti taraken a baka.

“Natalekak iti tarakenmi a baka ta adda katulongak a mangkitkita iti pannakaiwayway, panangpakan ken pannakailinong ti tarakenmi,” kinuna ni Mr. Christian Allen Ubaldo, Pasado a Presidente ti Pederasion ti 4-H Club a taga-Brgy. Cacadiran, Cabugao, Ilocos Sur.

Insupusop ni Mr. Baclig a patinayon a palpalagipanna dagiti agtartaraken a saanda a baybay-an dagitoy nga inawatda a responsibilidad agsipud ta paset iti programa ti Gobierno Munisipal  a panangsursuro kadagiti agtutubo nga agtaraken a maysa a napaneknekan a napintas a pamaltuadan ti matgedan a mangtulong iti indibidual a kameng ken ti pamiliana.

Manamnama a mairaman dagitoy a baka a mabakunaan/mapurga  iti maangay a massive vaccination/deworming nga isayangkat   ti Municipal Livestock Office kadagiti masanguanan nga aldaw. # (Web In-Action)

No comments:

Post a Comment