Cabugao, Ilocos Sur – Iti pannakiuman ti Web In-Action idi Agosto 15, 2013, impakaammo ni Municipal Rice Program Coordinator Nereo S. Daproza iti daytoy nga ili ket nagyaman dagiti mannalon ta saan a naapektaran ti mula idi immay nga bagyo Labuyo ken napigsa ti tudo ti inaldaw numan pay nakirang ti panagtudona iti naglabas a lawas ngem adda met dagiti makina ti padanum nga impaay ti LGU ken ti Department of Agriculture (DA) a madadaan nga usaren dagiti mannalon.
Innayon ni Mr. Daproza a mapattapatta nga 88 porsiento ti nakatalonen iti dagup ti 2,254 nga ektaria a mataltalon iti kada Wet Season ti ili a Cabugao.
Gapu iti regget dagiti nabatbati a di pay nakatalon, mananmnama a maiwakasda ti panagmulada iti arinunos daytoy bulan ti Agosto 2013.
Dagitoy nga aksion ken inisiatiba ket gubuay ti naimballigian a pannakaipatungpal dagiti programa ti DA-RFU 1 a nairut a kapartner ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno maikkan ti pagsayaatan dagiti mannalon a mayoridad a pakabuklan dagiti umili ti Cabugao, Ilocos Sur. # (Web In-Action)
No comments:
Post a Comment