LAUNCHING TI RAMIT-PAGKALAP, SANGAILI NI GOVERNOR RYAN

Cabugao, Ilocos Sur – Naaramid ti PNAP Launching and Awarding of Life Saving Devices a nagatendaran dagiti Opisiales ti Gobierno Probinsial nga idauluan  ni Governor Ryan Luis V. Singson, Opisiales ti Bureau of Fisheries and Aquatic Resources (BFAR) nga idauluan ni Regional Director Nestor Domenden, CESO IV, Opisiales ti LGU-Cabugao babaen iti panangyuna ni Vice Mayor DJ Savellano, kamkameng ti Dardarat Fishermen Association nga idauluan ni Brgy. Captain Danny S. Garcia, pannakabagi dagiti Association of Fisherfolks of Region 1 kasta metten  dagiti pabannakabagi ti Ilocos Sur Polytechnic College, Narvacan Campus. Naangay ti launching Ceremonies iti Dardarat Cove and Fish Sanctuary, Brgy. Dardarat, Cabugao, Ilocos Sur idi Agosto 6, 2013.

CLICK HERE TO VIEW MORE PHOTOS

Kalpasan a naiyam-ammo dagiti delegado, naipalawag iti annuroten ti pannakaipatungpal ti programa ken dagiti nagapuanan ti BFAR babaen kada Ms. Rosario Segundina P. Gaerlan, Assistant Regional Director, BFAR ken ni Ms. Amanda Galang, CHB Coordinator.

Iti Mensahe ni Gobernador Ryan Luis V. Singson, impaawatna  a dagitoy a naited a proyekto ket bunga iti nairut ken  nasayaat a “partnership”  ti National Government Agencies (NGA’s)  kadagiti LGU’s. Kimmablaaw ken nagyaman ni Gov. Ryan kadagiti delegado  a naggapu kadagiti Coastal Municipalities ti 1st District ken 2nd District, Ilocos Sur. Dinakamatna  nga ehemplo ti ili a Cabugao a nadaras a makikammayet ken mangprobitsar kadagiti proyekto ken programa a mangpasayaat ti kasasaad dagiti mangngalap-da ken natimpuyogda iti benneg ti barangay ken ti LGU-da. Pinadayawanna ti ili ti Cabugao a nakagun-od ti adu a pagsayaatan ken masanguanan pay a magun-od a proyekto gapu iti panagkaykaysada a kayatna a pagwadan ti amin iti sangkaprobinsiaan.

Pinagyamanan met ni Brgy. Captain Danny S. Garcia kadagiti nagun-odda a ramit-pagkalap kasta met kadagiti kakaduana iti kada ili gapu ta isu ti pangulo ti Pederasion ti mangngalap iti Ilocos Sur.

Nagyaman met ni Vice Mayor DJ Savellano a nangibagi ken ni Mayor Edgardo “Ediboy” S. Cobangbang, Jr. ta adu ti nagun-od ti ili a Cabugao a pagimbagan dagiti mangngalap. Naragsakan pay ni Vice Mayor DJ ta maipadpadayaw ti kinalaing dagiti Opisiales ti asosasion ti mangngalap ken ditoy ti napilida a sumangbayan iti kakastoy a dadakkel nga aktibidad nga ilunsad ti BFAR.

Iiti mensahe ni BFAR Regional Director Nestor Domenden, CESO IV, pinagyamananna iti involvement dagiti maseknan  a sektor, ahensia ken opisina kadaytoy a panggep a panangpasayaat ti kasasaad dagiti mangngalap. Impakaammona nga iti umay  a lawas ket ruk-atanda manen dagiti proyekto iti Payao ken 2 a patrol boat para iti Probinsia ti Ilocos Sur.

Buklen dagiti naited a ramit iti Life Vest  dagiti mangngalap kadagiti Coastal Munipalities, Marine Engine, ken Community-based Hatchery. Ginetteng da Gov. Ryan ken Director Domenden  dagiti laso a mangipalnaad iti pannakaisibro ti Hatchery. Naaramid pay ti signing ti Memorandum of Agreement (MOA) iti nagbabaetan dagiti naimbolbar nga Ahensia ken LGU’s babaen iti panagpirma  da Gov. Ryan, Director Domenden, Provincial Agriculturist Teofilo R. Quintal ken ni  Vice Mayor DJ Savellano.

Nag-Closing Remarks ni SB Member Benedict M. Savellano, Committee Chair on Agriculture. Kimmablaaw ken nagyaman ti Konsehal. Binigbigna  ti kinaganetget ken kinalaing dagiti asosasion ti  mangngalap ti ili a Cabugao a komkomplementaran met ti LGU kadagiti irusatda  a mangpasayaat  pay ti kasasaadda.

Nakipaset  met da SBM Danny Q. Gazmen, SBM Vicky S. Serna, SBM Jayhan Alcid Tan, SBM Dodjie Santella, SBM Benedicto M. Savellano, SBM Josefina S. Vallejo, SBM Josefina S. Vallejo, SBM Dr. Jemaima S. Tan-Yee ken SBM  Dr. Carlito S. Pano. # (Web In-Action)  

CLICK HERE TO VIEW MORE PHOTOS