Cabugao, Ilocos Sur - Umad-adu ti bilang ti nagatendar iti Farmers Field School iti Dardarat Farmers Association a naangay idi Agosto 16, 2013 a naangay mismo iti Barangay Hall, ti Brgy. Dardarat a nagpartisiparan dagiti Farmer-Enrollees nga idauluan ni Mr. Fermin Sesuca, Presidente ti Dardarat FA.
Naglektiur da Mr. Obas Bill Y. Baclig, AT; Mr. Robert S. Savella, AT; Mr. Nereo S. Daproza, AT; ken Miss Katryn Tapuro, AT. Maipapan iti AESA 5 (Agro-economic System Analysis) a daytoy ti kangrunaan a topiko a nawarwar tapno maikkan dagiti nagpartisipar iti pamalpalatpatanda iti adalenda. Sakbayna, nasapa a napan nagobserbar dagiti mannalon iti 5,000 metro-kuadrado a Learning Field-da ket binalonda dagiti naobserbarda iti pagklaseanda. Tunggal lider ti grupo ket nagipresentar ti naduktalanna ken nagnanaminganda a sangkagrupo iti iwayatda a maaramid a mangpasayaat ti rinaepanda.
Dagitoy a programa ti panangpasiken iti kaammuan ti mayataday a panagpatanor ti pagay ket gubuay ti napintas a panagtunos ti DA-RFU 1 ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno kankanayon nga umuna iti napintas a damag ti taga-Cabugao iti pakaseknan iti teknolohia ken programa ti DA. # (Web In-Action)
No comments:
Post a Comment