Cabugao, Ilocos Sur – Naorganisar dagiti Homeroom Parent-Teacher Association (HRPTA) iti Cabugao South Central School, segun ken ni Mrs. Melvie S. Sajonia, Principal II iti nasao a pagadalan para iti School Year 2015-2016.
Naaramid ti sumagmamano a reorganizational meeting idi Hunio 16, 2015 a nagpartisiparan dagiti nagannak, guardians ken mangisursuro iti kada klase a nareorganisar.
Imbatad dagiti kaaduan a nagannak/guardian a nasamay ti HRPTA a katinnarabay dagiti mangisursuro a mangtingiting ti dadduma a kasapulan ken pagsayaatan iti kuarto a pagklasean dagiti ubbing; mangpanunot iti nasamay a pamay-an no adda tumaud a pakaseknan ken epektibo a ramay ti General Assembly ti PTA iti pageskuelaan.
Kalpasan ti eleksion ti HRPTA ket maelektaran met dagiti Opisiales ti General PTA ti pagadalan a ditoy a mapili dagiti agtakem iti unos ti dua a tawen (agdepende iti termino a nakalanad iti paglinteganda) a katinnulong ti pagadalan a mangiwardas kadagiti obra a saan a masaparan dagiti mangisursuro iti uneg ti pagadalan.
Kabayatanna, maaramid met daytoy a panagpipili dagiti Opisiales kadagiti dadduma a pagadalan iti Cabugao DepED District a pakapilianto iti agtakem iti Federated PTA a mangibagi kadagiti nagannak iti daytoy a benneg iti intero a distrito. # (Web In-Action)
No comments:
Post a Comment