Cabugao, Ilocos Sur – Iti pannakiuman ti Web In-Action iti Hunio 17, 2015, imbatad ni Waterworks Superintendent Engr. Nestor B. Somera nga agtultuloy latta ti ipaayda a serbisio kadagiti umili nga end-users iti danum a mainum nga aggapu iti Magarang Water Springs, Brgy. Cacadiran, Cabugao, Ilocos Sur ken ti Roma-Kinalian Source a mangserbisio manipud iti Brgy. Maradodon agingga iti Brgy. Alina-ay.
Iti agdama, maipatpatungpal latta ti water rationing kadagiti barangay a maseknan tapno makapagbibingay dagiti konsumidores iti masakupan ti service area ti waterworks ti suplay ti danum.
Kabayatanna, adda met latta dagiti connection line ti tubo a tarimaanenda gapu iti panagrukop wenno dadduma pay a pakaigapuan ti panagproblema iti distribution line. Ngem maaksionan daras ken madagdagus a matarimaan dagitoy.
Innayon pay ni Engr. Somera nga aksionanda dagiti awag dagiti water-users uray aldaw ti Sabado ken Domingo agsipud ta inaldaw a nakasapulan ti danum iti panagbiag dagiti umili.
Insupusop pay ti Waterworks Superintendent a madagdagus a mataming/masolbar ti pakaseknan dagiti water consumers agsipud ta kankanayon latta met ti panagrekurida/monitor dagiti Collectors, Pifefitters ken Personnel a masakupan ti Cabugao Waterworks Office.
Nupay kasta, imbaga ni Mayor Edgardo “Ediboy” S. Cobangbang, Jr. iti panagsaritana iti imatang ti Pamilia-LGU kalpasan ti Flag Ceremony idi Hunio 15, 2015 nga agan-anus latta koma dagiti Personnel/Staff ti Cabugao Waterworks nga atendaran dagiti pagrebbenganda ken asikasuenda dagiti pakaseknan dagiti water-users ta tumartarabay met ti Munisipio iti pannakaalay-ay kadagiti tumaud a problema iti daytoy a benneg ti serbisio a para kadagiti umili. # (Web In-Action)
No comments:
Post a Comment