Cabugao, Ilocos Sur –Nakasagana dagiti seedlings iti Municipal Plant and Nursery, Brgy. Baclig, Cabugao, Ilocos Sur para iti maaramid a Tree Planting Activity kalpasan ti napipigsa a tudtudo iti agdama ken kadagiti masungad a bulbulan.
Daytoy ti imbaga ni Mr. Robert S. Savella, Acting Municipal Agriculturist ket ur-urayenda ti Go Signal no kasano a ruk-atanda dagiti Seedlings a kaaduanna ti Mahogany iti ikub ti Nursery.
Daytoy a gannuat ket panagsaganada iti pannakipasetda iti maaramid a Tree Planting Activities iti Munisipalidad ti Cabugao ita a bulan ti Hunio nga igannuat ti Munisipio, Barangay wenno dagiti NGO’s.
Innayon ni Mr. Savella a maiyataday unay iti gannuatda nga agpatanor/agurnong iti nasapsapa iti agduduma a seedlings a kas pangannurot ti Direktiba ti Municipal Chief Executive tapno adda latta madadaan a maimula kadagiti aktibidad ti Tree Planting iti panagmumula a bulan ita a Tawen 2015. Mangnamnamada pay a tumulong met dagiti Barangay a mangpaadu ti nagyan dagiti Nurseries iti eskuela (Elementaria ken High School) ken Barangay tapno adda katulonganda a mang-propagate iti umdas a seedlings a kasapulan a maimula iti aniaman a maisayangkat a Tree Planting Activity.
Dagitoy nga aksion ken inisiatiba ket resulta ti agtultuloy a pannakaitandudo ti panangpaberde ti aglawlaw babaen iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagitoy a panagmumula a bulbulan. # (Web In-Action)
No comments:
Post a Comment