Cabugao, Ilocos Sur – Maang-angay manen ti 20 nga aldaw a panagsanay dagiti napili nga Atleta iti lima a benneg ti DepED (Unit 1-5) iti Probinsia ti Ilocos Sur a maisangal iti maaramid a Region 1 Athletic Association Competition 2016. Maang-angay ti panagsanay kadagiti nagduduma nga events iti Cabugao Athletic Oval (Freedom Park), Brgy. Bonifacio, Cabugao, Ilocos Sur a no sadino a ditoy ket nagpartisiparan dagiti umaayam iti nadumaduma a pagadalan a mangbukel iti Unit 1 agingga iti Unit 5.
Tartarabayen met dagiti Coaches, Sports Officials ken Tournament Managers dagiti events dagiti nasao nga atleta ket simmangbay dagiti nadumaduma a Delegasion idi Pebrero 2, 2016 ditoy a nadakamat a disso.
Maipalagip a naangay ti panagbisita da Governor Ryan Luis V. Singson ken ni Mayor Edgardo “Ediboy” S. Cobangbang, Jr. kadagiti Atleta ken Opisiales ti DepED Sports iti Cabugao District Athletic Oval, Barangay Bonifacio, Cabugao, Ilocos Sur idi Pebrero 12, 2015 idi kallabes a tawen a no sadino a ditoy ket nagtitipon dagiti 369 nga Atleta, Officiating Officials, Coaches, Trainers, DepED Officials, ken Municipal Officials iti nasao a disso iti ili.
Kangrunaan pay a panggep ti panagatendar dagiti nasao nga Opisiales iti pannakaiturn-over dagiti Sports Uniforms kadagiti Atleta.
Nagyaman unay idi ti Gobernador iti agtultuloy a pannakibinnadang ti LGU Cabugao nga idauluan ni Mayor Ediboy kadagiti gannuat ti Gobernador ket kunana nga agbalin koma nga inspirasionda iti pannakaited ti napintas a pagyanan dagiti agsasalip nga ubbing iti pagadalan kasta met dagiti agsansanay para iti panagannayas dagiti programa ti Kapitolio iti agtultuloy a pannakamuli dagiti ubbing iti sports para iti intero a probinsia.
Kadayta a petsa iti Tawen 2015, naaramid ti Ceremonial Distribution of Uniforms kadagiti Atleta iti tunggal sports event babaen iti panangited da Governor Ryan Luis V. Singson, Mayor Edgardo “Ediboy” S. Cobangbang, Jr., Division Sports Coordinator Meneleo B. Palma ken dagiti Officiating Officials kadagiti maseknan nga immawat iti uniporme.
Iti taraudi ti Turnover, impeksa idi da Assistant Division Superintendent Arsenio Aludino ken ni Mr. Meneleo Palma ti nalaus a panagyamanda itoy a gannuat a pannakatulong dagiti Atleta babaen iti Provincial Government ken ti LGU-Cabugao.
Kalpasan ti Turnover, naaramid idi ti miting dagiti Sports Officials, Athletes, Coaches ken Trainers babaen iti panag-Preside ni Mr. Palma ket imbinsana dagiti pagannurotan ken linaon dagiti Memoranda ti DepED Regional Office para iti panagsagana ken ipapanda idi idiay Manaoag, Pangasinan a nakaangayan ti makalawas a RIAA 2015 Competition. # (Web In-Action)
No comments:
Post a Comment