Cabugao, Ilocos Sur – Addan iti maikatlo a lawas ( Enero 29-30) iti maang-angay a Rizal Basketball Clinic babaen iti panangtarawidwid ti Barangay Rizal nga idauluan ni ABC President Thaddeus “Teddy” U. Soller ken ni Kagawad Gabriel “Gabby” Sunio a katulongan dagiti Coaches manipud iti Vigan City, Ilocos Sur a kaduada a mangadal ken mangsanay iti aktual iti ay-ayam a basketball. Naangay ti panagsanay kadaytoy a petsa iti Brgy. Bonifacio Covered Court ken iti Cabugao Cultural and Sports Complex iti nagsaganad a dua nga aldaw.
Segun ken ni Kagawad Sunio a tunggal Sabado ken Domingo iti pannakaangay ti panagsanay.
Innayon ni Kagawad Gabby a maisentro daytoy a programa ti barangay a mangasa iti kabaelan ken paglaingan dagiti ubbing manipud agtawen ti 6 agingga iti 18 babaen iti panangadalda iti basic practice drills ken pannakailawlawag dagiti “fundamentals” kadaytoy nga ay-ayam.
Kangrunaanna, tapno agbalin a makumikom dagiti ubbing ken agtutubo ket maiyadayoda iti bisio. Kalpasan ti innem a lawas a panagsanay (kaaduan iti warm-up pay laeng ken basics, agtultuloyto latta a masanay dagiti trainees agingga a maan-anay a maadalda ti kaipapanan ti ay-ayam a basketball, insupusop pay ti Konsehal.
Nagatendar met iti umun-una a lawas ti panagsanay da Mr. Josh Edward S. Cobangbang ken ni Mayor Edgardo “Ediboy” S. Cobangbang, Jr.
Makikaysa met ni Mr. Ronel M. Ubaldo kas Sports Coordinator kadaytoy a panagsanay. # (Web In-Action)
No comments:
Post a Comment