Cabugao, Ilocos Sur – Kalpasan ti Flag Raising Ceremony idi Hulio 24, 2017, imbasa ni HRM Officer Miss Mimi S. Sison iti imatang ti Pamilia-LGU iti Pammilin ni Mayor Josh Edward S. Cobangbang maipapan iti agtultuloy nga akem ken pannakapapigsa ti Municipal Disaster Risk Reduction Management Council (MDRRMC) ken kasta metten a naipakaammo dagiti kameng iti Emergency Response Team (ERT) nga agaksion no tiempo ti kalamidad ken dagiti pagrebbengan dagitoy tapno mapapintas iti serbisio kadagiti umili a maapektaran iti kalamidad.
Kanaig daytoy, impakaammo ni Engr. Nestor B. Somera, LDRRM Officer ti LGU-Cabugao dagiti napagasatan nga empleado a nakaileppas iti uppat nga aldaw a panagsanay iti “Intensified WASAR Training” a naangay idi Hulio 19-22, 2017 a kas maiyataday iti Disaster Preparedness Program ti MDRRMC. Dagiti nagsanay ket isuda Danica Gazmen Magdato - Team leader, Michael Vicente, Shirley Solar, Daisy Ann Sienna, Bernadette Pacpaco, Nikki Palazo, Jonnell Solomon, Marvin Serrano, Gio Serna, Enzo Madamba, Nathan Vallejo, Dondon Pichay, Eladio Cabero & ken ni Boonchan Tan.
Daytoy a panagsanay ket insayangkat ti PDRRMC-Ilocos Sur a nagpartisiparan dagiti pannakabagi iti nadumaduma a Munisipalidad iti Probinsia. # (Web In-Action)
No comments:
Post a Comment