Cabugao, Ilocos Sur – Agtultuloy ti Anti-Dengue Campaign ti LGU-Cabugao babaen iti panangiwardas dagiti Personnel ti Cabugao Municipal Health Office nga idauluan da Dr. Mark-Lawrence T. Tirao ken ni Public Sanitary Inspector Jeanette Garcia ita a bulan ti Hulio 2017.
Nayeskediul ti panagturongda kadagiti pageskuelaan-sekundaria iti ili a kas iti Lipit National High School; Sisim National High School; Pug-os National High School; ken ti Cabugao National High School (Turod) tapno ipaganetgetda iti panagaramidda kadagiti aktibidad a mangprebentar iti panagraira daytoy a naranggas a sakit.
Nagitedda met iti material a pangkontra iti dengue a kas iti O/L (Obcidal/Larvacidal) Trap.
Kanaig daytoy, ti programa a Center for Health Development (CHDs) ti DOH ket kakammayetna ti LGU-Cabugao a nangaramid kadagiti aktibidad a nangipromot kadaytoy a gannuat itay bulan ti Hunio.
Buklen ti nasao nga estratehia iti pananglaban ti dengue babaen iti panangadaptarda iti DOH 4S Kontra Dengue: Search and Destroy, Seek early consultation, Self-protective measures and Say no to indiscriminate fogging.
Maibasar iti rekord ti RHU, epektibo ti pannakaipakat ti “Operation Taob” kadagiti barangay a panangibukbok kadagiti naurnong a danum/tudo kadagiti goma, bote ken lata tapno saan a pagitlogan ti lamok ken agtultuloy nga ar-aramidenda iti information initiatives kontra iti dengue.
Panagdaldalus iti aglawlaw ken madalusan dagiti nasamek a disso a posible a pagyanan ti lamok ti kaskenan pay nga maaramid. Sumarsaruno ti defogging a mausar a pangkontra iti makadangran a lamok no kumaron ti situasion.
Dagitoy nga aksion ken inisiatiba ket gubuay iti nasamay a programa iti pananglapped ti panagsaknap manen ti nadakamat a sakit ita a panawen ti panagtutudo babaen iti panangitandudo ti Gobierno Munisipal nga idauluan ni Mayor Josh Edward S. Cobangbang tapno masalbar dagiti umili nangruna kadagiti ubbing iti pannakakagat ti agdangran a lamok. # (Web In-Action)
No comments:
Post a Comment