Friday, July 14, 2017

LOCAL DISASTER RISK REDUCTION MANAGEMENT COUNCIL, NAGMITINGDA

Cabugao, Ilocos Sur – Naaramid ti panagtataripnong dagiti kameng ti Local Disaster Risk Reduction Management Council ti ili a Cabugao, Ilocos Sur nga idauluan ni Mayor Josh Edward S. Cobangbang idi Hulio 13, 2017 iti Early Childhood Care Development Building, Brgy. Rizal, Cabugao, Ilocos Sur.

Nagatendar dagiti kameng ti LDRRMC a buklen  dagiti Department Heads ti LGU-Cabugao; Sangguniang Bayan Members; pannakabagi ti PNP-Cabugao; BFP Cabugao; DepED Cabugao; NGO’s a kas iti Senior Citizen ken ti  CISTODAI; DOH-RHU Personnel; ken ti MDRRMC Members.

Immuna a naaramid ti Opening Prayer babaen ken ni SBM Josefina S. Vallejo. Nangited ti pakauna  a sarita ni Mayor Josh Edward S. Cobangbang ket kunana a  kasapulan a mapapigsa ti LDRRMC ta masungad manen dagiti bulan a pakapasamakan ti kalamidad ket kasapulan iti naan-anay a panagsagana tapno maikkan iti tumutop a serbisio dagiti umili a madidigraan.

Nagtitinnulong da MPDC ken Budget Officer Florante S. Jara; LDRRMC Officer Engr. Nestor B. Somera ken ni ABC President Thaddeus U. Soller a nag-preside ti miting.

Imbasa ni Engr. Somera iti nagan dagiti Opisiales a mangbukel kadagiti Komite ken Teams iti LDRRMC.

Imbatad ni MPDC Jara a kasapulan pay a requirement iti Annual Investment Plan ti panangkonsulta  iti LDRRMC iti LGU-Cabugao ken mataming dagiti mainayon a kasapulan tapno napigpigsa ti Council a mangaksion kadagiti kasapulan dagiti umili.

Bininsabinsa ni  Engr. Somera dagiti gapuanan ti MDRRMC a pannakatakiag ti LDRRMC iti napalabas a kalamidad ken dadakkel nga aktibidad iti ili ken  inramanna a dinakamat ti pagdurdur-asan dagiti naaramat a rescue gears and equipments; behikulo; panag-rescue  kadagiti maapektaran nga umili kabayatan iti kalamidad nangruna kadagiti agnaed iti coastal barangays; panagipakni kadagiti matuang a kayo iti national highway ken dadduma pay a parte ti Poblasion ken iti kankanayon a panagalertoda iti sakbay; panangrugi; kabayatan ken kalpasan  ti kalamidad kangrunaan kadagiti naglabas  a Bagyo.

Insupusop ni ABC President Thaddeus U. Soller a malaksid iti kaadda iti pundo kadagiti amin a kasapulan ket iti kaskenan ket iti presensia wenno kaadda dagiti kameng  ti LDRRMC kabayatan a mapaspasamak ti  kalamidad iti aldaw ken rabii.

Ginutigot ti ABC President ti nairut a panagtutunos dagiti kameng ket nupay adda nagkamtudan ti Konseho iti kallabes ket mapapigsa ita ti tignay no dumteng ti kalamidad nangruna ta addan pasdek ti Municipal Evacuation Center a pakasarakan metten iti Command Post dagiti agiyimplimentar.

Dadduma pay a napateg a naisingasing a mangpasayaat iti maited a serbisio ket dagiti sumaganad:

1. Panangorganisar dagiti Disaster Teams iti kaduada nga agtrabaho ken panangammoda kadagiti pagrebbenganda iti ayanda a Team no panawen ti kalamidad.

2. Pannakanayon ti dua iti agdama a tallo a chainsaw a mausar iti panagipakni iti mabual a pinuon.

3. Pannakanayon dagiti flashlights; botas; kapote ken helmet dagiti kameng ti LDRRMC.

4. Pannakipaset dagiti sektor/asosasion  a kas iti Cabugao Elite Riders Club; CISTODAI ken iti Samahang Ilokano (SI)  kadagiti aktibidad para iti rescue.

5. Pannakatuding dagiti mangamiris kadagiti nadidigra a sanikua iti barbarangay.

6. Pannapaadda dagiti relief goods a kasapulan laeng iti Evacuation Center kabayatan ti kalamidad.

7. Pannakagatang manen dagiti stockpile relief goods a maiwaras kadagiti agkasapulan a nadidigra.

8. Pannakapaadda iti reserba a langis a maipan iti drum a mausar  iti tiempo ti kalamidad.

9. Panangkondision kadagiti mausar iti komunikasion ken  madadaan a transportasion a mausar iti panagibakuit iti madidigraan.

Nangipaay met ti Mensahe ni Mayor Josh Edward. Inggunamgunamna iti naan-anay koma  a panagtitinnulong dagiti kameng ti LDRRMC iti panawen ti kalamidad. Imbagana a makisarita kadagiti agtagikua iti gasoline station tapno adda latta manamnama a magatang a suplay ti fuel iti tiempo ti kalamidad. # (Web In-Action)

No comments:

Post a Comment