Cabugao, Ilocos Sur – Agtultuloy ti Anti-Dengue Campaign ti LGU-Cabugao babaen iti panangiwardas ti Cabugao Municipal Health Office nga idauluan da OIC Municipal Health Officer Dr. Mark-Lawrence T. Tirao ken ni Public Sanitary Inspector Jeanette Garcia ita a bulan ti Hulio 2017.
Naileppas ti naaramid nga Interactive Lecture and Discussion kadagiti pageskuelaan-sekundaria iti ili a kas iti Lipit National High School; Sisim National High School; Pug-os National High School; ken ti Cabugao National High School (Turod) ket naballigi ti panggep daytoy nga aktibidad iti nagbaetan dagiti mangisursuro ken dagiti agad-adal.
Nagitedda met iti material a pangkontra iti dengue a kas iti Ovicidal/Larvicidal (O.L.) Mosquito Trap ken Demonstration met ti Operation Taob ti inaramid ni Ms. Jeanette V. Garcia, Public Sanitary Inspector.
Maibasar iti rekord ti RHU, epektibo ti pannakaipakat ti “Operation Taob” kadagiti barangay a panangibukbok kadagiti naurnong a danum/tudo kadagiti goma, bote ken lata tapno saan a pagitlogan ti lamok ken agtultuloy nga ar-aramidenda iti information initiatives kontra iti dengue.
Panagdaldalus iti aglawlaw ken madalusan dagiti nasamek a disso a posible a pagyanan ti lamok ti kaskenan pay nga maaramid. Sumarsaruno ti defogging a mausar a pangkontra iti makadangran a lamok no kumaron ti situasion.
Dagitoy nga aksion ken inisiatiba ket gubuay iti nasamay a programa iti pananglapped ti panagsaknap manen ti nadakamat a sakit ita a panawen ti panagtutudo babaen iti panangitandudo ti Gobierno Munisipal nga idauluan ni Mayor Josh Edward S. Cobangbang tapno masalbar dagiti umili nangruna kadagiti ubbing iti pannakakagat ti agdangran a lamok. # (Web In-Action)
No comments:
Post a Comment