Cabugao, Ilocos Sur – Nagsaruno a nagmiting dagiti kameng ti Federated Fishermens’ Association ti ili a Cabugao a mangbukel kadagiti asosasion ti mangngalap iti pito a coastal barangays ti ili a Cabugao kas iti Brgys. Salomague, Dardarat, Namruangan, Sabang, Daclapan, Salapasap ken Pug-os idi Hunio 30 ken Hulio 4, 2017 iti Early Childhood Care Development Building, Brgy. Rizal, Cabugao, Ilocos Sur.
Napagkaykaysaanda a maaramid ti Monthly Meeting-da iti umuna a Martes ti kada bulan a naaramid iti Hulio 4, 2017.
Daytoy a banag ket paset ti direktiba ken programa ti Gobierno Munisipal babaen iti liderato ni Mayor Josh Edward S. Cobangbang iti pannakaited ti naan-anay a pannakataming dagiti programa iti sektor dagiti mangngalap.
Nagatendar ken timmarabay ni SBM Atty. Randy Baniaga G. Kinaud, Committee Chairman on Agriculture, Fisheries and Cooperatives kadagiti nadakamat a panagtitipon dagiti mangngalap tapno mapabileg ken mapapigsada babaen iti pannakaorganisarda ken maisaruno iti pannakairehistroda (Accreditation) iti Munisipio wenno iti Department of Labor and Employment (DOLE) ken iti Securities and Exchange Commission (SEC).
Nakitinnarabay met ni Mr. Nerio Somera Daproza, AT, kabarbaro a Municipal Fisheries Coordinator. Innayon ni Mr. Somera a determinado dagiti mangngalap a maaddaanda iti Pederasion nga adda kabukbukodanna a juridical indentity tapno kabaelanda ti maki-transact/mangprobitsar kadagiti umisu nga Ahensia a makaited kadakuada iti proyekto a pakairanudanda a mangngalap. # (Web In-Action)
No comments:
Post a Comment