Wednesday, July 26, 2017

PROYEKTO PARA KADAGITI MANGNGALAP, NAIKASADA!

Cabugao, Ilocos Sur – Segun ken ni Municipal Fisheries Coordinator Nereo S. Daproza ti LGU-Cabugao, simmangpeten ti dadduma kadagiti proyekto a nakiddaw ken kasapulan dagiti coastal barangays iti ili a Cabugao, Ilocos Sur kas iti sumaganad:

1. Aquasilvi Project – 3,000 Malaga Fingerlings para idiay Barangay Dardarat ket madama ti pannakaaramid dagiti Fish Cages-da.

2. Oyster Farm – Madama ti pannakaaramid ti 24 Plastic Drum Floater iti Barangay Dardarat ken adda  150 a pedaso ti kawayan a suportarna.

Dagiti dadduma a plano a maipatungpal ket dagiti sumaganad:

1. Uppat a Payao Projects ti maipatakder iti Barangay Dardarat; Brgy. Salomague ken iti Barangay Namruangan kadaytoy agtapos ti Setiembre 2017.

2. Maaramid ti Seaweeds Nursery/Farm idiay Barangay Salomague inton maudi a Quarter daytoy a Tawen 2017.

Innayon ni Mr. Daproza nga addan 25 a nareorganisar a Fishermen Associations iti ili a Cabugao a mangsakup iti pito a coastal barangay ti ili ket manamnama nga agaktibo iti umabot ti 1,200 a bilang ti rehistrado a mangngalap a makikammayet kadagiti programa ken aktibidad  ti LGU-Cabugao nga idauluan ni Mayor Josh Edward S. Cobangbang pakaseknan iti pannakapasayaat ti kasasaad dagiti mangngalap.

Kadua ni Mr. Daproza da SBM Atty. Randy Baniaga G. Kinaud, Chairman, Committee on Agriculture, Fisheries and Organizations ti Konseho Munisipal  agraman ken ni MFARMC Chairman Danny S. Garcia ken ni Federated Fishermen President Magno Carbonel a mangtimtimon kadagiti mangngalap ken mangtartarabay kadagiti aktibidades ken proyektoda a maipatungpal babaen iti BFAR Region 1 ken ti LGU-Cabugao. # (Web In-Action)

No comments:

Post a Comment