AGASSAWA A BALIKBAYAN, NAGIDONARDA MANEN ITI SALOMAGUE E/S

Cabugao, Ilocos Sur – Dagiti agassawa a  Mr. Wenceslao Serrano Savella ken ni Mrs. Constancia Santella-Savella, agpada a nagturpos ditoy a pagadalan idi Tawen 1969 ken  Balikbayan a naggapu idiay Los Angeles, California, USA ket nagidonarda manen iti kasapulan ti pageskuelaan ti Salomague Elementary School nga idauluan ni Mr. Ronel M. Ubaldo, Head Teacher III.

Dagiti manen naidonar ket 40 a unit iti  Desk (naaramid iti kayo); 80 a Monobloc Chairs ken Lima (5)  a Monobloc Tables. Nai-turnover dagitoy nadakamat a donasion iti pageskuelaan babaen iti naaramid a simple a programa iti sango ti pageskuelaan idi Marso 1, 2018 nga inimatangan dagiti agad-adal; Mangisursuro; Barangay Officials; PTA Officials ken dagiti Balikbayan nga agassawa a nagidonar. Nasangaili ken nangted ti Mensahe ni Public Schools District Supervisor Dr. Consesa T. Rumias, D. Ed.

Iti panaglukat ti programa, pammasangbay a sarita  ti impaay ni Kagawad Felipe Salarzon, PTA President.

Nagsaruno a nagsarita dagiti agasswa a Balikbayans. 

Nangipaay met ti Mensahe ni Dr. Rumias.

Nalaus a panagyaman ti bugas ti panagsarita ni Mr. Ronel M. Ubaldo, Head Teacher III.

Naited ti Plaque of Appreciation nga impaay ti Salomague Elementary School ken ti  Parent-Teachers Association.

Iti panangawat ni Mr. Savella ti dokumento ti pammigbig ket impeksana met ti panagyamanna iti Opisiales ti Pageskuelaan ken dagiti Barangay Officials ti Barangay Salomague. Dinayawna ti napintas a kammayet ti pageskuelaan, bumarangay a mangikalikagum iti agtultuloy a pannakapasayaat ken pannakapaadda dagiti kasapulan iti pagadalan ti Barangay Salomague. Innayon ti Balikbayan Donor nga agtultuloy a tumulong kadagiti kailianna para iti masakbayan dagiti ubbing nga agad-adal. 

Kalpasan ti simple a programa ket napagsasanguan dagiti naisagana a taraon.

Sakbayna, nagidonar ti  proyekto dagiti agassawa a da  Mr. Wenceslao Serrano Savella ken ni Mrs. Constancia Santella-Savella iti pannakabangon ti kabarbaro nga School Stage ti Salomague Elementary School.

Naited kadagiti Balikbayan nga Agassawa iti Certificate of Appreciation nga impaay ti LGU-Cabugao idi Mayo 8, 2017 ditoy Munisipio ken  naited pay  ti Resolution No. 28, Series of 2017 iti Sangguniang Bayan ti ili a Cabugao a pangipeksaan ti Konseho Munisipal  ti panagyaman ti sibubukel nga umili ti Cabugao, Ilocos Sur babaen iti liderato ni Mayor Josh Edward S. Cobangbang iti pannakaidonar  ken ti pannakabangon ti kabarbaro nga stage ti nadakamat a pagadalan a maiserbi kadagiti agdama nga agbasbasa ken kadagiti sumarsaruno a henerasion iti agad-adal. # (Web In-Action)